តុលាការកំពូលរបស់ប្រទេសឥណ្ឌា បានបញ្ជាឲ្យគ្រូពេទ្យទាំងអស់ដែលកំពុងតវ៉ា ពាក់ព័ន្ធនឹងការរំលោភ និងសម្លាប់លើគ្រូពេទ្យស្រីម្នាក់ កាលពីខែមុន ចាប់ផ្ដើមការងារឡើងវិញ នៅថ្ងៃអង្គារ (ទី១០ ខែកញ្ញា) ដោយព្រមានថា ពួកគេអាចប្រឈមមុខនឹងការមាន «វិធានការមិនល្អ» ប្រសិនបើពួកគេមិនគោរពតាមកាលកំណត់ទេនោះ។

គ្រូពេទ្យរាប់រយនាក់ នៅទូទាំងប្រទេស បាននាំគ្នាឈប់ពីការងារ ខណៈដែលពួកគេទាមទារយុត្តិធម៌ឲ្យស្ត្រី ដែលសពរបស់នាងត្រូវបានប្រទះឃើញ កាលពីថ្ងៃទី៩ ខែសីហា ក្នុងថ្នាក់រៀន នៅឯ R.G. Kar Medical College & Hospital នៅទីក្រុង Kolkata របស់រដ្ឋ West Bengal ភាគខាងកើត ជាកន្លែងដែលនាងធ្វើការងារ ក្នុងនាមជាគ្រូពេទ្យហាត់ការ។

នគរបាលស្ម័គ្រចិត្តម្នាក់ ត្រូវបានចាប់ខ្លួនពីបទឧក្រិដ្ឋ ហើយនគរបាលសហព័ន្ធ បានប្រាប់កាលពីសប្តាហ៍មុនថា អតីតនាយកសាលាក៏ត្រូវបានចាប់ខ្លួនផងដែរ ពីបទចោទប្រព្រឹត្តអំពើពុករលួយ។

ក្រៅពីការតវ៉ារកយុត្តិធម៌ឲ្យជនរងគ្រោះ គ្រូពេទ្យទាំងអស់ ក៏បាន និងកំពុងទាមទារឲ្យមានភាពល្អប្រសើរជាងនេះ នៅក្នុងមន្ទីរពេទ្យគ្រប់គ្រងដោយរដ្ឋាភិបាល ដែលពួកគេនិយាយថា ខ្វះសន្តិសុខ និងហេដ្ឋារចនាសម្ព័ន្ធជាមូលដ្ឋាន ដូចជាកន្លែងសម្រាកសម្រាប់បុគ្គលិកជាដើម។

យ៉ាងណាក្ដី នៅថ្ងៃចន្ទនេះ តុលាការកំពូល បានលើកឡើងថា គ្មានវិធានការណ៍អវិជ្ជមានណាមួយ នឹងត្រូវបានធ្វើឡើង ចំពោះក្រុមគ្រូពេទ្យដែលត្រឡប់ចូលធ្វើការវិញ នៅល្ងាចថ្ងៃអង្គារ។

ជាមួយគ្នានេះ តុលាការក៏បានបញ្ជាឲ្យរដ្ឋាភិបាលប្រចាំរដ្ឋ West Bengal ចាត់វិធានការធ្វើយ៉ាងណា ដើម្បីធានាដល់គ្រូពេទ្យទាំងអស់ថា កង្វល់របស់ពួកគេកំពុងត្រូវបានដោះស្រាយ ក្នុងនោះរួមទាំងដោយការផ្តល់បន្ទប់កាតព្វកិច្ច និងបន្ទប់ទឹកដាច់ដោយឡែក សម្រាប់បុគ្គលិកប្រុសស្រី និងការដំឡើងកាមេរ៉ាសុវត្ថិភាព (CCTV)។

បាតុកម្ម ជុំវិញការហតុការណ៍នេះ បានរីករាលដាលហួសពីប្រទេសឥណ្ឌា កាលពីចុងសប្តាហ៍ ខណៈដែលជនអន្តោប្រវេសន៍ឥណ្ឌាខ្លួនរាប់ពាន់នាក់ បានតវ៉ានៅក្នុងទីក្រុងជាង ១៣០ នៅទូទាំង ២៥ប្រទេស ក្នុងនោះរួមទាំងប្រទេសជប៉ុន អូស្ត្រាលី អឺរ៉ុប និងសហរដ្ឋអាមេរិកផងដែរ៕