ប្រធានាធិបតីទួរគី លោក អឺដូហ្កាន់ (Erdogan) បានធ្វើការអត្ថាធិប្បាយ បន្ទាប់ពីបានពិពណ៌នាអំពី ទាហានអ៊ីស្រាអែលដែលបានសម្លាប់ស្រ្តីជនជាតិអាមេរិកដើមកំណើតទួរគីម្នាក់ ដែលចូលរួមក្នុងការតវ៉ាកាលពីថ្ងៃសុក្រប្រឆាំងនឹងការពង្រីកការតាំងទីលំនៅ នៅតំបន់វេសបែង (West Bank) ដែលគ្រប់គ្រង ដោយអ៊ីស្រាអែល។

លោក បាននិយាយនៅឯព្រឹត្តិការណ៍សមាគមសាលាឥស្លាមមួយនៅជិតទីក្រុងអ៊ីស្តង់ប៊ុលថា «ជំហានតែមួយគត់ ដែលនឹងបញ្ឈប់ភាពក្រអឺតក្រទមរបស់អ៊ីស្រាអែល ការលួចបន្លំរបស់អ៊ីស្រាអែល និងអំពើភេរវកម្មរដ្ឋអ៊ីស្រាអែល គឺជាសម្ព័ន្ធភាពនៃបណ្តាប្រទេសឥស្លាម»។

លោកប្រធានាធិបតី បានថ្លែងថា ជំហានថ្មីៗដែលទួរគី បានអនុវត្តដើម្បីបង្កើនទំនាក់ទំនងជាមួយអេហ្ស៊ីប និងស៊ីរី គឺសំដៅលើ «ការបង្កើតខ្សែបន្ទាត់នៃសាមគ្គីភាពប្រឆាំងនឹងការគំរាមកំហែងនៃការវាតទីនិយមដែលលោកបាននិយាយថា ក៏បានគំរាមកំហែងដល់ប្រទេសលីបង់ និងស៊ីរីផងដែរ។

លោក អឺដូហ្កាន់ បានធ្វើជាម្ចាស់ផ្ទះទទួលប្រធានាធិបតីអេហ្ស៊ីប អាប់ដែល ហ្វាតា អាល់ស៊ីស៊ី (Abdel Fattah al-Sisi) នៅទីក្រុងអង់ការ៉ា ក្នុងសប្តាហ៍នេះ ហើយពួកគេ បានពិភាក្សាអំពីសង្គ្រាមនៅតំបន់ហ្កា ហ្សា និងវិធីដើម្បីជួសជុលបន្ថែមទៀតនូវទំនាក់ទំនងដែលជាប់គាំងជាយូរមកហើយរបស់ពួកគេ ក្នុងអំឡុងពេល ដែលជាដំណើរទស្សនកិច្ចរបស់ប្រធានាធិបតីបែបនេះ ជាលើកដំបូងក្នុងរយៈពេល ១២ឆ្នាំ។