នគរបាលបាននិយាយថា យន្តហោះដែលមានមនុស្ស ៤៨នាក់ ជិះនៅលើនោះ បានរអិលចេញពីផ្លូវរត់ ក្នុងតំបន់ដាច់ស្រយាលប៉ាពួ (Papua) ភាគខាងកើតនៃប្រទេសឥណ្ឌូនេស៊ី នៅថ្ងៃចន្ទ (ទី៩ ខែកញ្ញា) នេះ ដោយបានធ្វើឲ្យអ្នកដំណើរជាច្រើនរងរបួស។

ប្រទេសប្រជុំកោះ នៅតំបន់អាស៊ីអាគ្នេយ៍មួយនេះ មានកំណត់ត្រាសុវត្ថិភាពអាកាសចរណ៍មិនសូវល្អនោះទេ ហើយតំបន់ប៉ាពួ ត្រូវបានគ្របដណ្ដប់ភូមិសាស្ត្រតំបន់ភ្នំដែលការហោះហើរត្រូវបានរំខាន ដោយការមានអាកាសធាតុមិនល្អជាញឹកញាប់។

យន្តហោះ ATR-42 ដែលជាកម្មសិទ្ធិរបស់ក្រុមហ៊ុនអាកាសចរណ៍ Trigana Air កំពុងហោះចេញពីអាកាសយានដ្ឋានមួយ នៅក្នុងតំបន់រាជានុសិទ្ធដាច់ស្រយាលប្រជុំកោះ Yapen ទៅកាន់រដ្ឋធានី Jayapura របស់ តំបន់ប៉ាពួ នៅព្រឹកថ្ងៃចន្ទនេះ នៅពេលដែលយន្តហោះនោះបានរអិលចេញពីផ្លូវរត់។ ជើងហោះហើរនេះបានដឹកអ្នកដំណើរចំនួន ៤២នាក់ ក្នុងនោះមានទាំងទារកម្នាក់ និងក្រុមនាវិក ៦នាក់ផងដែរ។

ទីភ្នាក់ងារស្វែងរក និងជួយសង្គ្រោះ ក្នុងតំបន់ បានឲ្យដឹងនៅក្នុងសេចក្តីថ្លែងការណ៍ថា អ្នកដំណើរមួយចំនួន បានរងរបួស និងមានអារម្មណ៍ភ័យតក់ស្លុត ដោយសារឧបទ្ទវហេតុនេះ៕