នៅថ្ងៃចន្ទនេះ វិមានក្រឹមឡាំង បានចោទសួរពីសេចក្តីរាយការណ៍របស់កាសែត Wall Street Journal ថា អ៊ីរ៉ង់ បានបញ្ជូនមីស៊ីលបាលីស្ទិករយៈចម្ងាយជិតដល់រុស្ស៊ី ដោយពួកគេនិយាយថា អ៊ីរ៉ង់ គឺជាដៃគូដ៏សំខាន់របស់រុស្ស៊ី ហើយប្រទេសទាំង ២ បានបង្កើតកិច្ចសន្ទនាលើគ្រប់វិស័យទាំងអស់ ។

 កាសែត Wall Street Journal បានលើប្រភពពីក្រុមមន្រ្តីគ្មានអត្តសញ្ញាណរបស់សហរដ្ឋអាមេរិក និងអឺរ៉ុបថា អ៊ីរ៉ង់ បានបញ្ជូនមីស៊ីលបាលីស្ទិករយៈចម្ងាយជិតដល់រុស្ស៊ី ។

 លោក Dmitry Peskov គឺជាអ្នកនាំពាក្យវិមានក្រឹមឡាំង និយាយថា លោកបានមើលឃើញសេចក្តីរាយការណ៍នេះ ប៉ុន្តែមិនមែនមានន័យថាសេចក្តីរាយការណ៍ទាំងអស់ត្រឹមត្រូវនោះទេ ។

 លោក Peskov បាននិយាយប្រាប់ក្រុមអ្នកសារព័ត៌មានថា អ៊ីរ៉ង់ គឺជាប្រទេសដៃគូដ៏សំខាន់របស់ពួកយើង ពួកយើងបានបង្កើតទំនាក់ទំនងពាណិជ្ជកម្ម និងសេដ្ឋកិច្ច ពួកយើងបានបង្កើតកិច្ចសហប្រតិបត្តិការ និងកិច្ចសន្ទនារបស់ពួកយើងលើគ្រប់វិស័យស្ទើតែទាំងអស់ រួមទាំងវិស័យដ៏រសើបបំផុតផងដែរ ។

 សូមបញ្ជាក់ថា ទីក្រុងតេអេរ៉ង់ និងទីក្រុងម៉ូស្គូ មានទំនាក់ទំនងកាន់តែជិតស្និតគ្នា ចាប់តាំងពីរុស្ស៊ីបញ្ជាទាហានរាប់ម៉ឺននាក់ចូលវាយលុកអ៊ុយក្រែនកាលពីខែកុម្ភៈ ឆ្នាំ ២០២២ ក្នុងនោះអ៊ីរ៉ង់ បានផ្គត់ផ្គង់យានដ្រូន Shahedរបស់ខ្លួន ដល់យោធារុស្ស៊ីផងដែរ ៕