ប្រព័ន្ធផ្សព្វផ្សាយអ៊ីរ៉ង់ នៅថ្ងៃចន្ទ (ទី៩ ខែកញ្ញា) នេះ បានរាយការណ៍ថា មេបញ្ជាការជាន់ខ្ពស់នៃកងឆ្មាំបដិវត្តន៍អ៊ីរ៉ង់ បានបដិសេធរបាយការណ៍ ដែលថា អ៊ីរ៉ង់កំពុងបញ្ជូនមីស៊ីលទៅរុស្ស៊ី ក្នុងពេលមានការព្រួយបារម្ភ នៅក្នុងប្រទេសលោកខាងលិចថា មីស៊ីលទាំងនោះអាចត្រូវបានដាក់ពង្រាយ ក្នុងសង្គ្រាម នៅអ៊ុយក្រែន។

សារព័ត៌មាន CNN និង Wall Street Journal បានរាយការណ៍កាលពីសប្តាហ៍មុនដោយដកស្រង់ប្រភពមិនស្គាល់អត្តសញ្ញាណថា អ៊ីរ៉ង់បានបញ្ចូនមីស៊ីលបាលីស្ទិករយៈចម្ងាយខ្លីទៅកាន់ប្រទេសរុស្ស៊ី។

ឧត្តមសេនីយ៍ត្រី លោក Fazlollah Nozari មេបញ្ជាការរងនៃទីស្នាក់ការកណ្តាល Khatam al-Anbia ត្រូវបានដកស្រង់សម្តីដោយទីភ្នាក់ងារព័ត៌មានការងារអ៊ីរ៉ង់ ដែលនិយាយថា «គ្មានមីស៊ីលត្រូវបានបញ្ជូនទៅកាន់ប្រទេសរុស្ស៊ីទេ ហើយការអះអាងនេះ គឺជាប្រភេទនៃសង្គ្រាមចិត្តសាស្ត្រ»។ លោក Nozari បានប្រាប់ថា «អ៊ីរ៉ង់មិនគាំទ្រភាគីណាមួយនៃជម្លោះអ៊ុយក្រែន-រុស្ស៊ីទេ»។

យ៉ាងណាក្ដី នៅពេលត្រូវបានសួរអំពីរបាយការណ៍ នៅថ្ងៃទី៩ ខែកញ្ញានេះ វិមានក្រឹមឡាំង បាននិយាយថា អ៊ីរ៉ង់គឺជាដៃគូរបស់រុស្ស៊ី ហើយថា ប្រទេសទាំង២ កំពុងអភិវឌ្ឍការសន្ទនាលើគ្រប់វិស័យ។

កាលពីសប្តាហ៍មុន អ៊ុយក្រែនបានលើកឡើងថា ការពង្រឹងកិច្ចសហប្រតិបត្តិការយោធា រវាងទីក្រុងតេអេរ៉ង់ និងមូស្គូ គឺជាការគំរាមកំហែងដល់អ៊ុយក្រែន អឺរ៉ុប និងមជ្ឈិមបូព៌ា ហើយបានអំពាវនាវឲ្យសហគមន៍អន្តរជាតិបង្កើនសម្ពាធលើអ៊ីរ៉ង់ និងរុស្ស៊ី៕