ទីភ្នាក់ងារឆ្លើយតបគ្រាអាសន្នរបស់ប្រទេសនីហ្សេរីយ៉ា បានប្រាប់ឲ្យដឹងថា រថយន្តដឹកប្រេង ១គ្រឿង បានបុកចំពីមុខពេញជាមួយរថយន្តដឹកទំនិញ ១គ្រឿងទៀត នៅក្នុងប្រទេសនីហ្សេរីយ៉ា កាលពីថ្ងៃអាទិត្យ (ទី៨ ខែកញ្ញា) ដោយបណ្តាលឲ្យមានការផ្ទុះដែលបានសម្លាប់មនុស្សយ៉ាងហោចណាស់ ៥២នាក់។ 

លោក Abdullahi Baba-Arab អគ្គនាយកនៃទីភ្នាក់ងារគ្រប់គ្រងគ្រោះអាសន្ន (SEMA) របស់រដ្ឋ Niger បាននិយាយថា រថយន្តដឹកទំនិញនោះ មានដឹកមនុស្ស និងគោក្របី នៅតំបន់ Agaie ក្នុងរដ្ឋ Niger ហើយការបុកគ្នាបានកើតឡើងនៅម៉ោងប្រហែល ០០:៣០ ម៉ោងក្នុងស្រុក ថ្ងៃអាទិត្យ (ត្រូវនឹងម៉ោង២៣:៣០ ម៉ោងសកល ថ្ងៃសៅរ៍) ខណៈរថយន្តទាំង២ ត្រូវអណ្ដាតភ្លើងឆាបឆេះ ដែលបណ្ដាលឲ្យមានការបាត់បង់ជីវិតទាំងមនុស្ស និងសត្វ។ 

លោក Baba-Arab បាននិយាយថា ប្រតិបត្តិការស្វែងរក និងជួយសង្គ្រោះ កំពុងដំណើរការនៅកន្លែងកើតហេតុ។ ចំណែកលោក Ibrahim Husseini អ្នកនាំពាក្យរបស់ SEMA ក្រោយមកបានបញ្ជាក់ពីចំនួនអ្នកស្លាប់ ហើយបាននិយាយថា ជនរងគ្រោះត្រូវបានបញ្ចុះសពក្នុងផ្នូរដ៏ធំមួយ បន្ទាប់ពីមានការផ្ទុះនោះ។

ដោយមិនមានប្រព័ន្ធផ្លូវដែកល្អប្រសើរ ក្នុងការដឹកជញ្ជូនទំនិញ គ្រោះថ្នាក់ចរាចរណ៍ដែលបណ្ដាលឲ្យមានស្លាប់ ហាក់ដូចជាហេតុការណ៍ប្រក្រតី នៅតាមដងផ្លូវសំខាន់ៗភាគច្រើន ក្នុងប្រទេសនីហ្សេរីយ៉ា ជាប្រទេសដែលមានប្រជាជនច្រើនបំផុត នៅទ្វីបអាហ្វ្រិក។

ក្នុងឆ្នាំ២០០ តែមួយគត់ មានឧបទ្ទវហេតុរថយន្តដឹកប្រេងសាំងចំនួន ១.៥៣១លើក ដែលបណ្តាលឲ្យមានមនុស្សស្លាប់ចំនួន ៥៣៥នាក់ និងរបួស ១.១៤២នាក់។ នេះបើយោងតាមទីភ្នាក់ងារសុវត្ថិភាពចរាចរណ៍ផ្លូវគោករបស់ប្រទេសនីហ្សេរីយ៉ា៕