នៅថ្ងៃចន្ទនេះ រដ្ឋមន្រ្តីការបរទេសរុស្ស៊ីលោក Sergei Lavrov បានជួបជាមួយរដ្ឋមន្រ្តីការបរទេសអារ៉ាប៊ីសាអូឌីតព្រះអង្គម្ចាស់ Faisal bin Farhan និងអគ្គលេខាធិការក្រុមប្រឹក្សាកិច្ចសហប្រតិបត្តិការឈូងសមុទ្រលោក Jasem Al-Budaiwi នៅក្នុងទីក្រុង Riyadh ។

 លោក Lavrov កំពុងបំពេញទស្សនកិច្ចនៅទីក្រុង Riyadh ដើម្បីចូលរួមកិច្ចប្រជុំរវាងក្រុមមន្រ្តីកិច្ចសហប្រតិបត្តិការឈូងសមុទ្រ និងក្រុមមន្រ្តីរុស្ស៊ី ។

 លោក បានបំពេញទស្សនកិច្ចនេះ ស្របពេលកើតមានភាពតានតឹងឡើងកម្តៅខ្លាំងនៅក្នុងតំបន់មជ្ឈិមបូព៌ា ។

សារព័ត៌មានរដ្ឋស៊ីរី រាយការណ៍នៅថ្ងៃចន្ទនេះថា ការវាយប្រហាររបស់អ៊ីស្រាអែល បានសម្លាប់មនុស្ស ១៦នាក់ នៅតំបន់ភាគខាងលិចស៊ីរី និងបណ្តាលឲ្យមនុស្សរាប់សិបនាក់ផ្សេងទៀត រងរបួសកាលពីយប់កន្លងទៅ ដែលជាការវាយប្រហារស្លាប់មនុស្សច្រើនបំផុត ត្រូវបានរាយការណ៍ដោយក្រុមអាជ្ញាធរស៊ីរី ចាប់តាំងពីស្ថានទូតអ៊ីរ៉ង់នៅទីក្រុងដាម៉ាស់ រងការវាយប្រហារកាលពីខែមេសា ។

ក្រុមឃ្លាំមើលសង្គ្រាមស៊ីរី បានរាយការណ៍ថា អ៊ីស្រាអែល បានវាយប្រហារតាមអាកាសទៅលើអគារស្រាវជ្រាវផ្នែកវិទ្យាសាស្ត្រ និងឃ្លាំងអាវុធមួយកន្លែង កាលពីយប់ថ្ងៃអាទិត្យ។

ដោយឡែក ទីភ្នាក់ងារសង្កេតការណ៍ស៊ីរីទទួលបន្ទុកសិទ្ធមនុស្ស បាននិយាយថា ការវាយប្រហារ បានកំណត់គោលដៅលើទីតាំងនានានៅក្រុង Masyaf ក្នុងខេត្ត Hama ភាគខាងលិចប្រទេសស៊ីរី ៕