ភ្នំពេញ ៖ សម្តេចតេជោ ហ៊ុន សែន ប្រមុខរាជរដ្ឋាភិបាល បានរម្លឹកថា សម្រាប់កម្ពុជាដែល​ជា​ប្រទេស​ធ្លាប់ឆ្លងកាត់នូវសង្គ្រាម និងវិនាសកម្ម សន្តិភាពពិតជាមាន តម្លៃមិនអាចកាត់ថ្លៃបាន។ ការរម្លឹកពីកត្តាសុខសន្តិភាពរបស់ប្រមុខរាជរដ្ឋាភិបាលកម្ពុជាបែបនេះ ត្រូវបានធ្វើឡើង​តាម​រយៈសារលិខិត​របស់សម្តេច ក្នុងឱកាសទិវាសន្តិភាពអន្តរជាតិ ថ្ងៃទី២១ ខែកញ្ញា ឆ្នាំ២០២១។

សម្តេចមានប្រសាសន៍ថា អ្វីៗគ្រប់យ៉ាងដែលកម្ពុជាសម្រេចបានមកដល់ពេលនេះ ទាំងការអភិវឌ្ឍ និងទាំងវិបុលភាព គឺជាផ្លែផ្កាសន្តិភាព។ ក្នុងន័យនេះ សម្តេចក៏បានថ្លែងអំណរគុណ ចំពោះ​ព្រះសង្ឃ និងបងប្អូនជនរួមជាតិទាំងអស់ ដែលបានផ្ដល់ការគាំទ្រដល់សារ នយោបាយរបស់សម្តេច គឺ «អរគុណសន្តិភាព» ។

អាស្រ័យហេតុនេះ សម្តេច ក៏បានអំពាវនាវដល់បងប្អូនជនរួមជាតិទាំងអស់ រួបរួមសាមគ្គី​ឯកភាព​ជាតិជាធ្លុងមួយ រក្សាការពារ សន្តិភាព ដើម្បី​សុខដុមរមនា សុខុមាលភាព​សម្រាប់​បងប្អូន​ជនរួមជាតិទាំងអស់គ្នា និងការអភិវឌ្ឍ ប្រកបដោយចីរភាព។

សារលិខិត បានសរសេរថា អង្គការសហប្រជាជាតិបានអនុម័តយកថ្ងៃទី២១ ខែកញ្ញា ជារៀងរាល់ឆ្នាំ សម្រាប់ពិភពលោក ប្រារព្ធទិវាសន្តិភាពអន្តរជាតិ ដើម្បីឧទ្ទិសដល់ការពង្រឹងឧត្តមគតិសន្តិភាព សំរាប់ប្រជាជន និងបណ្តាប្រទេសទាំងអស់នៅទូទាំងសកលលោក ។

សម្រាប់ឆ្នាំ២០២១នេះ នៅក្នុងបរិបទដែលពិភពលោក កំពុងទទួលរងផលប៉ះពាល់យ៉ាងធ្ងន់ធ្ងរ​ដោយ​ជំងឺរាតត្បាត កូវីដ-១៩ ទិវាសន្តិភាពអន្តរជាតិត្រូវបាន រៀបចំក្រោមមូលបទ "ការស្ដារពិភព​លោក​ឱ្យមានភាពប្រសើរឡើងវិញ ប្រកបដោយសមធម៌ និង និរន្តរភាព" ដោយផ្តល់គុណតម្លៃជា​ចម្បង​ដល់សន្តិភាព ដែលជាមូលដ្ឋានគ្រិះនៃការខឹតខំប្រឹងប្រែង រួមគ្នាស្ដាពិភពលោក​ឱ្យរួចផុតពី​គ្រោះមហន្តរាយ បង្កឡើងដោយជំងឺរាតត្បាតនេះ។

សម្តេច ក៏បានបង្ហាញ នូវបទពិសោធន៍ និងមេរៀនដ៏ជូរចត់ដែលកម្ពុជាធ្លាប់​ទទួល​​បាន​នៅក្នុង​ដំណាក់​កាលឆ្លងកាត់ អស់រយៈជាងពីរ​ទសវត្សរ៍ ​នៃភ្លើងសង្គ្រាម និងរបបប្រល័យពូជសាសន៍ បាន​ធ្វើឱ្យយើងទាំងអស់គ្នាយល់ច្បាស់ ពីតម្លៃនៃសន្តិភាព និងស្ថិរភាព ដែលជាមូលដ្ឋានគ្រឹះក្នុង​ការ​អភិវឌ្ឍប្រទេសជាតិ។ អស់រយៈពេលជិត២៣ឆ្នាំហើយ ចាប់តាំងពីថ្ងៃទី២៩ធ្នូ ឆ្នាំ១៩៩៨ ការបញ្ចប់​សង្គ្រាមនៅលើទឹក ដីមាតុភូមិកម្ពុជា ដោយ "នយោបាយឈ្នះ-ឈ្នះ” របស់សម្តេច បាននាំមក​នូវសុខសន្តិភាព ពេញលេញ និងការឯកភាពជាតិទាំងស្រុង​ពិតប្រាកដជាលើកដំបូង​នៅក្នុង​ប្រវត្តិសាស្ត្រកម្ពុជា។

រយៈពេលដ៏វិសេសវិសាលថ្លៃថ្លានេះ បានផ្ដល់ឱកាសដល់រាជរដ្ឋាភិបាលនិងប្រជាជនកម្ពុជាខិតខំ ប្រឹងប្រែងស្តារ និងកសាងប្រទេសជាតិឡើងវិញ ព្រមទាំងបោះជំហានយ៉ាងរឹងមាំនៅលើមាគ៌ា អភិវឌ្ឍន៍ និងទទួលបានការរីកចម្រើនលើគ្រប់វិស័យគួរជាទីមោទនៈ សមស្របតាមពាក្យស្លោក មានសន្តិភាព មានការអភិវឌ្ឍ។

សម្តេចក៏បានបង្ហាញពីការប្តេជ្ញាចិត្ត បើទោះជាកម្ពុជា កំពុងទទួលរងផលប៉ះពាល់ដោយសារ​វិបត្តិ​ជំងឺកូវីដ ១៩ យ៉ាងណាក៏ដោយ ក៏អត្រាកំណើនសេដ្ឋកិច្ចកម្ពុជាសម្រាប់ឆ្នាំ២០២១ រំពឹងថា នឹងអាចងើបឡើងមកវិញស្ថិតនៅក្នុងរង្វង់ ២,៥% បន្ទាប់ពីការធ្លាក់ចុះក្នុងកម្រិត -១,៩% ក្នុងឆ្នាំ២០២០ ។

ទោះស្ថិតនៅក្នុងស្ថានភាពលំបាកបែបនេះ យ៉ាងណាក៏ដោយ សម្តេចបញ្ជាក់ សារជាថ្មីពីការប្ដេជ្ញា​ចិត្ត​របស់រាជរដ្ឋាភិបាល ក្នុងការតម្រង់ទិសដៅគោល នយោបាយ និងធនធាន របស់ខ្លួនដើម្បីបន្ត​ប្រយុទ្ធប្រឆាំងនឹងវិបត្តិកូវីដ-១៩ តាមរយៈការជំរុញយុទ្ធនាការចាក់វ៉ាក់សាំង ជូនប្រជាជនឱ្យ​បាន១៣លាននាក់ តាមការគ្រោងទុក ការទ្រទ្រង់ជីវភាពរស់នៅរបស់ប្រជាពលរដ្ឋ ជួយរក្សា​លំនឹង​អាជីវកម្ម-ធុរកិច្ច ស្ដារនិងជំរុញការងើបឡើងវិញ នៃសេដ្ឋកិច្ចឱ្យបានឆាប់រហ័ស ដោយបង្កើនការ​យក​ចិត្តទុកដាក់លើការអភិវឌ្ឍប្រព័ន្ធសុខាភិបាល និងប្រព័ន្ធគាំពារសង្គម។

រាជរដ្ឋាភិបាល កម្ពុជាបាននិងកំពុងរៀបចំ និងគ្រោងដាក់ចេញផែនការស្តារសេដ្ឋកិច្ចឡើងវិញ ពីវិបត្តិកូវីដ-១៩ សម្រាប់ឆ្នាំ២០២១-២០២៣ ដោយផ្តល់អាទិភាពចំបងលើ៖(១)ស្តារឡើងវិញ គឺកសាងមូលដ្ឋានរឹងមាំ សម្រាប់សេដ្ឋកិច្ចវិលទៅរកកំណើនឡើងវិញ ដោយផ្តោតលើការធានា​សុវត្ថិភាព ការគ្រប់គ្រងផលប៉ះពាល់ ការរក្សាលំនឹង និងការជំរុញឱ្យងើបឡើងវិញ​នៃធុរកិច្ច​ដែល​មានសក្តានុពល ជាពិសេស ក្នុងវិស័យដែលទទួលរងផលប៉ះពាល់ខ្លាំង និងការបង្កើតការងារ​បន្ថែម​ឱ្យបានច្រើន និងឆាប់រហ័ស (២) កែទម្រង់ គឺបន្តដាក់ចេញវិធានការកែទម្រង់សំខាន់ៗ​ជា​រចនា​សម្ព័ន្ធ ដែលរួមមានការធ្វើឱ្យ ប្រសើរឡើងនូវបរិយាកាស និងកិច្ចសម្រួលពាណិជ្ជកម្ម ការវិនិយោគ និងធុរកិច្ច និងការជំរុញនិងការអភិវឌ្ឍឌីជីថលូបនីយកម្មក្នុងប្រព័ន្ធសេដ្ឋកិច្ច ទាំងវិស័យសាធារណៈ និងឯកជន និង(៣) កសាងភាពធន់ គឺពង្រឹងការត្រៀមខ្លួន និងការឆ្លើយតបទៅនឹងជំងឺ ឬស្ថានភាព​ស្រដៀង​គ្នា​ ដែលអាចផ្ទុះឡើង នាពេលអនាគត ដោយផ្តោតលើការអភិវឌ្ឍប្រព័ន្ធសុខាភិបាល និងប្រព័ន្ធគាំពារសង្គមដែលរឹងមាំ មានប្រសិទ្ធភាព និងការធានាចីរភាព និងបរិយាប័ន្ន នៃការស្តារ និងការអភិវឌ្ឍសេដ្ឋកិច្ច-សង្គម។ ទោះក្នុងតម្លៃណាក៏ដោយ​សម្តេចថា ត្រូវតែការពារ​សន្តិភាព​ឱ្យបាន៕

អត្ថបទ មុត សុទ្ធ