យោធាអ៊ីស្រាអែល បាននិយាយកាលពីថ្ងៃចន្ទ (០៩ កញ្ញា) ថា ខ្លួនបានបញ្ជាឱ្យជម្លៀសតំបន់លំនៅឋាន និងទីប្រជុំជនជាច្រើននៅជិតទីក្រុងហ្កាហ្សា ដោយព្រមានអំពីការប្រយុទ្ធគ្នាដ៏ខ្លាំងក្លាដែលជិតមកដល់ បន្ទាប់ពីរ៉ូកែតជាច្រើនគ្រាប់បានបាញ់ចេញពីតំបន់នោះ។

លោក អាវីឆាយ អាដ្រែ (Avichay Adraee) អ្នកនាំពាក្យយោធាបានបង្ហោះនៅលើវេទិកាប្រព័ន្ធផ្សព្វផ្សាយសង្គម X នូវផែនទីបង្ហាញតំបន់ជាច្រើននៅភាគពាយព្យនៃតំបន់ហ្កាហ្សា ដែលត្រូវជម្លៀស ដោយប្រកាសថាទីតាំងទាំងនេះជាផ្នែកមួយនៃ «តំបន់ប្រយុទ្ធដ៏គ្រោះថ្នាក់»។ អ៊ីស្រាអែល បានចេញបញ្ជាជម្លៀសជាច្រើនដងក្នុងអំឡុងពេលសង្គ្រាមប្រឆាំងនឹងក្រុមហាម៉ាស នៅតំបន់ហ្កាហ្សា ដែលបង្កឡើងដោយការវាយប្រហារថ្ងៃទី០៧ តុលា របស់ក្រុមសកម្មប្រយុទ្ធប៉ាឡេស្ទីនមួយនេះ។

យោងតាមអង្គការសហប្រជាជាតិ បទបញ្ជាជម្លៀសនោះបានគ្របដណ្តប់លើទឹកដីភាគច្រើននៃតំបន់ហ្កាហ្សា ហើយរួមបញ្ចូលតំបន់ដែលយោធាធ្លាប់បាននិយាយថា បានបោសសំអាតក្រុមប្រដាប់អាវុធប៉ាឡេស្ទីនភាគច្រើនរួចរាល់។ លោក Adraee បាននិយាយថា យុទ្ធជនប៉ាឡេស្ទីន «បានបាញ់រ៉ូកែតទៅលើរដ្ឋអ៊ីស្រាអែលជាថ្មីម្តងទៀត» ពីភាគពាយ័ព្យរបស់ហ្កាហ្សា ដែលជាការផ្តោតសំខាន់នៃប្រតិបត្តិការយោធារបស់អ៊ីស្រាអែល ក្នុងដំណាក់កាលដំបូងនៃសង្រ្គាម។

យោងតាមអង្គការសហប្រជាជាតិ ប្រជាជនភាគច្រើនក្នុងចំនួន ២,៤លាននាក់នៃតំបន់ហ្កាហ្សាត្រូវបានជម្លៀសយ៉ាងហោចណាស់ម្តង ក្នុងអំឡុងសង្គ្រាមជាង ១១ខែនេះ។ បទបញ្ជាជម្លៀសពីមុនបានធ្វើឱ្យអ្នកស្រុកសម្រុកភៀសខ្លួនចេញពីតំបន់ ឬទីក្រុងទាំងមូលជាមួយនឹងខោអាវជាប់នឹងខ្លួនប៉ុណ្ណោះ ដោយមិនអាចយករបស់របរអ្វីទៅជាមួយបានឡើយ៕