ក្រុមហ៊ុន Apple កាលពីថ្ងៃចន្ទ (០៩ កញ្ញា) បានបើកបង្ហាញទូរសព្ទ iPhone 16 ដែលទន្ទឹងរង់ចាំជាយូរមកហើយរបស់ខ្លួន រួមជាមួយមុខងារបញ្ញាសិប្បនិម្មិត AI កាន់តែទំនើប និងបានសន្យាថានឹងមានការកែលម្អនៅក្នុងមុខងារជំនួយការ ស៊ីរី (Siri) របស់ទូរសព្ទឱ្យកាន់តែប្រសើរ ខណៈខ្លួនបានបញ្ចេញកម្មវិធីថ្មី ដែលចាប់ផ្តើមនៅក្នុងកម្រិតសាកល្បងនៅខែក្រោយ។

នាយកប្រតិបត្តិ Apple លោក ធីម ឃុក (Tim Cook) បាននិយាយនៅក្នុងកម្មវិធីសម្ពោធផលិតផលរបស់ខ្លួនថា «iPhone ជំនាន់ក្រោយត្រូវបានរចនាឡើងសម្រាប់ទូរសព្ទឆ្លាតវៃ អេបផល អ៊ីនថែលលីជែន (Apple Intelligence)។ នេះជាការចាប់ផ្តើមនៃយុគសម័យថ្មីដ៏គួរឱ្យរំភើប»។

ក្រុមហ៊ុន Apple និងក្រុមហ៊ុនបច្ចេកវិទ្យាជុំវិញពិភពលោកកំពុងប្រជែងគ្នាដើម្បីបន្ថែមមុខងារ AI ទៅក្នុងផលិតផល ហើយទូរសព្ទត្រូវបានគេរំពឹងថានឹងក្លាយជាសមរភូមិដ៏សំខាន់បំផុត។ នាយកប្រតិបត្តិបាននិយាយថា Apple Intelligence ដែលជាកម្មវិធី AI របស់ក្រុមហ៊ុន នឹងត្រូវបានប្រើដើម្បីកែលម្អ Siri ក៏ដូចជាការពង្រឹងមុខងារដូចជាការយល់ដឹង និងកំណត់អត្តសញ្ញាណវត្ថុដែលបានថតដោយកាមេរ៉ាទូរសព្ទ។

ទូរសព្ទ iPhone 16 និង 16 Plus នឹងមានតម្លៃដូចគ្នា ខណៈម៉ូដែលទាំងពីរប្រើបន្ទះឈីបថ្មី និងស្រោមអាលុយមីញ៉ូម។ ម៉ូដែលកម្រិតខ្ពស់ជាងនេះគឺ iPhone 16 Pro និង 16 Pro Max ផលិតពីទីតានីញ៉ូម និងមានសមត្ថភាព AI កាន់តែច្រើន ដូចជាការផ្តល់យោបល់អំពីរបៀបរៀបចំការថតរូបកាន់តែមានប្រសិទ្ធភាព និងសមត្ថភាពកាត់តសំឡេងក្នុងបំណងផលិតវីដេអូកម្រិតអ្នកជំនាញ។

Apple ក៏បានបញ្ចេញនាឡិកាដៃ និងកាសត្រចៀក អ៊ែរផត (AirPods) ថ្មីជាមួយនឹងសមត្ថភាពផ្តោតលើសុខភាព ក៏ដូចជាការកែលម្អការរចនាផ្នែករឹង (Hardware) ផងដែរ។ ក្រុមហ៊ុន Apple បានគូសបញ្ជាក់ពីសមត្ថភាពរបស់នាឡិការក្នុងការស្វែងរកស្ថានភាពសុខភាពរយៈពេលវែង ដូចជាការពិបាកដកដង្ហើមពេលគេង ក៏ដូចជាការរកឃើញ និងឆ្លើយតបទៅនឹងភាពអាសន្នដូចជាការដួលជាដើម៕