ដោយជាស្រុកកំណើតនៃឯករាជ្យភាពរបស់សហរដ្ឋអាមេរិក ឥឡូវនេះទីក្រុង ហ្វីឡាឌែលហ្វៀ (Philadelphia) ក្នុងរដ្ឋ ផិនស៊ីលវេនៀ (Pennsylvania) នឹងក្លាយជាវេទិកាដ៏សំខាន់ម្តងទៀតនៅពេលដែលលោកស្រី Kamala Harris និងលោក Donald Trump ជួបគ្នានៅក្នុងការជជែកដេញដោលតាមទូរទស្សន៍ ដែលអាចមានឥទ្ធិពលយ៉ាងខ្លាំងលើការបោះឆ្នោតខែវិច្ឆិកា។

បេក្ខភាពប្រធានាធិបតីទាំងពីរដែលមិនធ្លាប់ជួបគ្នាផ្ទាល់ ឥឡូវនេះនឹងជួបជជែកគ្នានៅម៉ោង ៦ល្ងាច (ម៉ោងអាមេរិក ត្រូវនឹង 6pm PDT ឬ 9pm ET) ថ្ងៃអង្គារនេះសម្រាប់ការពិភាក្សាដេញដោល ៩០នាទី រៀបចំដោយទូរទស្សន៍ ABC News។ នគរបាលត្រៀមខ្លួនសម្រាប់ការតវ៉ានានាដោយក្រុមគាំទ្រប៉ាឡេស្ទីន ដែលខឹងសម្បារនឹងលោកស្រី Harris ដែលបន្តគាំទ្រដល់អ៊ីស្រាអែល។ របាំងសន្តិសុខត្រូវបានបង្កើតឡើងនៅជុំវិញមជ្ឈមណ្ឌលធម្មនុញ្ញជាតិ ដែលជាទីតាំងសម្រាប់ការជជែកដេញដោល ដើម្បីការពារសុវត្ថិភាព និងសណ្ដាប់ធ្នាប់ក្នុងអំឡុងព្រឹត្តិការណ៍។

ទន្ទឹមនឹងនេះ ភោជនីយដ្ឋាន និងសាកលវិទ្យាល័យមួយចំនួនក្នុងទីក្រុងកំពុងរៀបចំកម្មវិធីមើលការជជែកតស៊ូមតិដ៏ប្រវត្តិសាស្រ្តនេះ។ សមាជិកជាន់ខ្ពស់បក្សប្រជាធិបតេយ្យនឹងប្រមូលផ្តុំនៅសណ្ឋាគារមួយដើម្បីមើលព្រឹត្តិការណ៍នោះ ដែលលោកស្រី Harris ត្រូវបានគេរំពឹងថានឹងចូលរួមបន្ទាប់ពីការជជែកបានបញ្ចប់។ ចំណែកផែនការរបស់លោក Trump បន្ទាប់ពីការជជែកដេញដោល មិនទាន់បង្ហាញជាសាធារណៈនៅឡើយទេ។

អ្នកស្រុកនៅទីក្រុង Philadelphia មួយចំនួននិយាយថា ពួកគេសង្ឃឹមថានឹងស្វែងយល់បន្ថែមពីលោកស្រី Harris ក្នុងព្រឹត្តិការណ៍ដ៏ធំនោះ។ ជាមួយនឹងការបោះឆ្នោតចំនួន ១៩រដ្ឋ រដ្ឋ Pennsylvania គឺជាទីតាំងដ៏សំខាន់បំផុតក្នុងចំណោមរដ្ឋសមរភូមិដែលរំពឹងថានឹងសម្រេចលើការបោះឆ្នោត។ អ្នកវិភាគភាគច្រើនព្យាករថា អ្នកណាដែលឈ្នះនៅរដ្ឋ Pennsylvania នឹងឈ្នះតំណែងសេតវិមាន៕