កងកម្លាំងនគរបាលបានប្រើឧស្ម័នបង្ហូរទឹកភ្នែកបំបែកក្រុមបាតុករជានិស្សិតរាប់ពាន់នាក់នៅក្នុងរដ្ឋ ម៉ានីពួរ (Manipur) ប្រទេសឥណ្ឌាកាលពីថ្ងៃចន្ទ ៩ កញ្ញា ខណៈពួកគេបានអំពាវនាវឱ្យមានសន្តិភាពស្របពេលមានអំពើហិង្សានៅតែបន្តក្នុងតំបន់នេះ។

យោងតាមក្រុមមន្ត្រីបានឲ្យដឹងថា អំពើហិង្សារវាងសហគមន៍ មីតី (Meitei) និងកុលសម្ព័ន្ធ គូគីស (Kukis) ក្នុងខេត្ត ម៉ានីពួរ បានបណ្តាលឱ្យមនុស្សស្លាប់ចំនួន៦ នាក់ក្នុងនោះមានជនស៊ីវិលម្នាក់កាលពីថ្ងៃសៅរ៍ ទី ៧ ខែកញ្ញា។

ជម្លោះបានបន្តកើតឡើងចាប់តាំងពីការសម្រេចចិត្តរបស់តុលាការកាលពីឆ្នាំមុន ដែលបានលើកឡើងថាសហគមន៍មីតី ក៏គួរទទួលបានអត្ថប្រយោជន៍សេដ្ឋកិច្ច និងកូតាដែលបានបម្រុងទុកសម្រាប់ជនជាតិគូគីស(Kukis)ផងដែរ។

យោងតាមទីភ្នាក់ងារសារព័ត៌មាន ANI អំពើហិង្សាបានបណ្តាលឱ្យមនុស្សស្លាប់ជាង២២៥នាក់ និងមនុស្សប្រមាណ៦ម៉ឺននាក់ត្រូវភៀសខ្លួន។ ការបាញ់ប្រហារដោយកាំភ្លើងថ្មីៗកាលពីថ្ងៃសៅរ៍ បានក្លាយជាថ្ងៃមានរលកថ្មីនៃអំពើហិង្សាដ៏បង្ហូរឈាមបំផុត ដែលបានចាប់ផ្តើមមួយសប្តាហ៍មុននេះ។ អំឡុងពេលនេះ ក៏បានមើលឃើញផងដែរ ថាក្រុមសកម្មប្រយុទ្ធប្រើប្រាស់យានដ្រូនដើម្បីទម្លាក់គ្រឿងផ្ទុះ ដែលធ្វើឲ្យជម្លោះកើនឡើងយ៉ាងខ្លាំង ។

រដ្ឋ ម៉ានីពួរ ដែលមានប្រជាជនចំនួន ៣,២លាននាក់ ឥឡូវនេះត្រូវបានបែងចែកទៅជាតំបន់ជនជាតិភាគតិចចំនួនពីរគឺជ្រលងភ្នំក្រោមការគ្រប់គ្រងរបស់ជនជាតិភាគតិចមីតី និងភ្នំគ្រប់គ្រងដោយក្រុមកុលសម្ព័ន្ធគូគីស (Kukis) ដែលត្រូវបានបំបែកដាច់ដោយឡែកដោយកងកម្លាំងសហព័ន្ធ៕