​អ៊ីរ៉ង់៖ ប្រមុខ​ទីភ្នាក់ងារ​នុយក្លេអ៊ែរ​ថ្មី​របស់​អ៊ីរ៉ង់​ លោក Mohammad Eslami បាន​អំពាវនាវ​កាលពី​ថ្ងៃ​ចន្ទ​ ឱ្យ​សហរដ្ឋអាមេរិក​ដក​ទណ្ឌកម្ម​ទាំងអស់​ចេញពី​ប្រទេស​អ៊ីរ៉ង់​។​ បន្ទាប់ពី​ដក​អាមេរិក​ចេញពី​កិច្ច​ព្រម​ព្រៀង​នុយក្លេអ៊ែរ​មួយ ​ដែលមាន​គោលបំណង​ពង្រឹង​កម្មវិធី​នុយក្លេអ៊ែរ​របស់​ទីក្រុង​តេ​អេ​រ៉ង់ អតីត​ប្រធានាធិបតី​អាមេរិក​លោក Donald Trump បានដាក់​ទណ្ឌកម្ម​យ៉ាង​តឹងរ៉ឹង​លើ​ទីក្រុង​តេ​អេ​រ៉ង់​។​

​នៅក្នុង​សុន្ទរកថា​មួយ​នៅឯ​សន្និសីទ​ទូទៅ​ នៃ​ទីភ្នាក់ងារ​ថាមពលបរមាណូ​អន្តរជាតិ (IAEA) នៅ​ទីក្រុង​វី​យែ​ន ប្រទេស​អូទ្រីសកាលពី​ថ្ងៃ​ចន្ទ ​លោក Eslami បានបញ្ជាក់​ជាថ្មី​ថា ​អ៊ីរ៉ង់​នៅតែ​ចាប់អារម្មណ៍​លើ​ “ការចរចា​ដែល​ផ្តោតលើ​លទ្ធផល​” ​លើ​ការវិលត្រឡប់​ទៅរក​កិច្ចព្រមព្រៀង​ដែល​គេ​ស្គាល់​ថា​ ជា​ផែនការ​សកម្មភាព​រួម​គ្រប់​ជ្រុងជ្រោយ (JCPOA)។ ​កិច្ចព្រមព្រៀង​ឆ្នាំ២០១៥ មាន​គោលបំណង​រារាំង​អ៊ីរ៉ង់​មិនឱ្យ​អភិវឌ្ឍន៍​អាវុធ​នុយក្លេអ៊ែរ​ ដែល​ក្រុង​តេ​អេ​រ៉ង់​បដិសេធ​ថា ​ខ្លួន​មិនបាន​ស្វែងរក​ការផលិត​នុយក្លេអ៊ែរ​ ដូច​មហាអំណាច​ពិភពលោក​គិត​នោះ​ទេ​។​

​ក្រោម​បទប្បញ្ញត្តិ​របស់​ខ្លួន ការ​ដាក់​ទណ្ឌកម្ម​រប​ស់​អង្គការសហប្រជាជាតិ​ ដែល​ជះឥទ្ធិពល​យ៉ាង​ធ្ងន់ធ្ងរ​ដល់​សេដ្ឋកិច្ច​របស់​ប្រទេស ​ដែល​សំបូរ​ប្រេង​ត្រូវបាន​ដកចេញ ប៉ុន្តែ​លោក Trump បាន​ដាក់​ទណ្ឌកម្ម​ទាំងនោះ​ឡើងវិញ​ដោយ​ឯកតោភាគី ​និង​បាន​បន្ថែម​ទណ្ឌកម្ម​តឹងរ៉ឹង​ជាង​មុន ​នៅ​ពេល​សហរដ្ឋអាមេរិក​ដកខ្លួន​ចេញពី​កិច្ចព្រមព្រៀង​នេះ​នៅ​ឆ្នាំ២០១៨។ ​ប្រមុខ​របស់​ទីភ្នាក់ងារ​ថាមពលបរមាណូ​អន្តរជាតិ (IAEA) លោក Rafael Grossi បាន​និយាយ​ថា ​លោក​សង្ឃឹម​ថា​នឹង​វិលត្រឡប់​ទៅ​ទីក្រុង​តេ​អេ​រ៉ង់​វិញ​ ក្នុង​ពេល​ឆាប់ៗ​នេះ​សម្រាប់​ការពិគ្រោះ​យោ​បល់​បន្ថែម និង​ដើម្បី​ត្រួសត្រាយ​ផ្លូវ​សម្រាប់​កិច្ចប្រឹងប្រែង​ការទូត​ដ៏​សំខាន់​ផ្សេងទៀត​។ ​នៅ​មិនទាន់​មាន​កាលបរិច្ឆេទ​សម្រាប់​ការ​បន្ត​ការចរចា​ ដើម្បី​ស្តារ​កិច្ចព្រមព្រៀង​នុយក្លេអ៊ែរ​អ៊ីរ៉ង់​ឡើងវិញ​នៅឡើយ​ទេ​៕

អត្ថបទ៖ សុខមាន