រដ្ឋមន្ត្រីការបរទេសរុស្ស៊ីលោក ហ្សើហ្គេ ឡាវរ៉ូហ្វ (Sergey Lavrov) បាននិយាយកាលពីថ្ងៃចន្ទសប្ដាហ៍នេះថា គំនិតផ្តួចផ្តើមសន្តិភាពរបស់មេដឹកនាំអ៊ុយក្រែនលោក Vladimir Zelensky បានក្លាយជាការរំខានខ្លាំងសម្រាប់មនុស្សគ្រប់គ្នា ហើយជាលក្ខខណ្ឌសុទ្ធសាធ បន្ទាប់ពីកិច្ចប្រជុំស្តីពីកិច្ចសហប្រតិបត្តិការយុទ្ធសាស្ត្រជាមួយរដ្ឋអារ៉ាប់នៃឈូងសមុទ្រពែក្ស។

ថ្លែងនៅក្នុងសន្និសីទសារព័ត៌មានក្នុងទីក្រុង រីយ៉ាដ (Riyadh) ប្រទេសអារ៉ាប៊ីសាអ៊ូឌីត លោក Lavrov បានបញ្ជាក់ថា ការទទូចរបស់បស្ចិមលោកក្នុងការប្រកាន់ខ្ជាប់នូវអ្វីដែលហៅថា រូបមន្តសន្តិភាព របស់លោក Zelensky បង្ហាញថា ខ្លួនពុំមានបំណងចរចាជាមួយទីក្រុងមូស្គូក្នុងលក្ខខណ្ឌស្មើគ្នានោះទេ។

ប្រមុខការទូតរុស្ស៊ីរូបនេះ បានចំអកថា គំនិតផ្តួចផ្តើមរបស់មេដឹកនាំអ៊ុយក្រែន ត្រូវបានគេស្គាល់ជាយូរមកហើយ ដោយវាបានក្លាយជាការរំខានខ្លាំងសម្រាប់មនុស្សគ្រប់គ្នា វាគឺជាការទាមទាររបស់លោកប៉ុណ្ណោះ។

រដ្ឋមន្ត្រីការបរទេសរូបនេះបានបន្ថែមថា ការពិតដែលថាលោកខាងលិចកំពុងប្រកាន់ខ្ជាប់នូវឱសានវាទនេះ មានន័យតែមួយគត់ គឺលោកខាងលិចមិនចង់ចរចាដោយស្មោះត្រង់នោះឡើយ ។

លោកក៏បានលើកឡើងផងដែរថា បណ្ដាអ្នកគាំទ្រអ៊ុយក្រែន ចង់ធ្វើអ្វីគ្រប់យ៉ាងតាមអំណាចរបស់ពួកគេដើម្បីឱ្យរុស្ស៊ីខិតកាន់តែជិតស្ថានភាពមួយជាទីដែលអាចនឹងប្រកាសថាយើងបានទទួលបរាជ័យជាយុទ្ធសាស្ត្រនៅលើសមរភូមិសង្គ្រាមតាមបំណងរបស់ពួកគេ៕