ក្រសួងយុត្តិធម៌អាមេរិក កាលពីថ្ងៃចន្ទ (ទី៩ ខែកញ្ញា) បានប្រាប់ទៅចៅក្រមសហព័ន្ធថា ក្រុមហ៊ុន Google បានបង្កើតនូវភាពផ្តាច់មុខ នៅក្នុងបច្ចេកវិទ្យារកប្រាក់កម្រៃដែលផ្តល់ការផ្សាយពាណិជ្ជកម្មតាមប្រព័ន្ធអ៊ីនធឺណិត ដោយចាប់ផ្តើមការកាត់ក្តីសំណុំរឿងប្រឆាំងទំនុកចិត្តរបស់សហព័ន្ធជាលើកទី២ លើក្រុមហ៊ុនបច្ចេកវិទ្យាយក្សមួយនេះ ចំពេលមានការត្រួតពិនិត្យលើឧស្សាហកម្មនេះ។

នៅក្នុងសេចក្តីថ្លែងការណ៍បើកការជំនុំជម្រះ លោកស្រី Julia Tarver Wood ដែលជាប្រមុខនៃមេធាវីតំណាងឲ្យរដ្ឋាភិបាល បានប្រាប់ឲ្យដឹងថា ក្រុមហ៊ុន Google បានប្រើប្រាស់ការទិញយកក្រុមហ៊ុនសូហ្វវែរ (កម្មវិធី) ផ្សាយពាណិជ្ជកម្ម គឺក្រុមហ៊ុន DoubleClick ក្នុងឆ្នាំ២០០៨ ដើម្បីគ្រប់គ្រងបច្ចេកវិទ្យាដែលលក់ការដេញថ្លៃការផ្សាយពាណិជ្ជកម្ម នៅលើគេហទំព័រ ក្នុងពេលដែលអ្នកប្រើប្រាស់ចូលមើល។

លោកស្រីបាននិយាយថា ឥឡូវនេះ ក្រុមហ៊ុន Google មានចំណែកទីផ្សារ ៨៧ភាគរយ នៅក្នុងបច្ចេកវិទ្យាលក់ការផ្សាយពាណិជ្ជកម្មនោះ ដែលអាចឲ្យក្រុមហ៊ុនគិតថ្លៃខ្ពស់ជាងមុន និងចាប់យកចំណែកកាន់តែធំនៃការលក់នីមួយៗ ដែលធ្វើឲ្យប៉ះពាល់ដល់អ្នកផ្សាយព័ត៌មាន និងម្ចាស់គេហទំព័រផ្សេងទៀត។

អ្នកស្រី Wood ដែលបាននិយាយនៅក្នុងតុលាការសហព័ន្ធអាមេរិក ប្រចាំតំបន់ភាគខាងកើតនៃរដ្ឋ Virginia បានបន្ថែមថា ទីបំផុត ក្រុមហ៊ុន Google បានប្រើប្រាស់ទំហំ និងឥទ្ធិពលរបស់ខ្លួន ដើម្បីរាំងខ្ទប់គូប្រជែង និងរៀបចំច្បាប់ ដើម្បីពង្រឹងវិធានការរកប្រាក់ចំណេញរបស់ខ្លួន។

សូមបញ្ជាក់ថា ការកាត់ក្តីនេះកើតចេញពីករណីមួយ គឺ US et al v Google (អាមេរិក និងរដ្ឋផ្សេងទៀតប្ដឹង Google) ដែលក្រសួងយុត្តិធម៌ និងរដ្ឋចំនួន ៨ បានប្តឹងក្រុមហ៊ុន Google ក្នុងឆ្នាំ២០២៣។ នៅក្នុងបណ្តឹងរបស់ខ្លួន ទីភ្នាក់ងារ និងបណ្ដារដ្ឋទាងនោះ បានចោទប្រកាន់ក្រុមហ៊ុនអ៊ីនធឺណិតយក្សមួយនេះ ពីបទរំលោភលើការគ្រប់គ្រងបច្ចេកវិទ្យាផ្សាយពាណិជ្ជកម្មរបស់ខ្លួន និងបំពានច្បាប់ប្រឆាំងទំនុកចិត្ត។

ក្រុមហ៊ុន Google បានបដិសេធការចោទប្រកាន់នេះ ដោយនិយាយថា រដ្ឋាភិបាល កំពុងព្យាយាមរំខានប្រព័ន្ធដែលផ្តល់អត្ថប្រយោជន៍ដល់អាជីវកម្មខ្នាតតូចដែលដំណើរការការផ្សាយពាណិជ្ជកម្ម និងដល់អ្នកដែលបង្កើតមាតិកា៕