ភ្នំពេញ៖ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និង​សំណង់ បានជំរុញទៅដល់អ្នកដែលធ្វើការងារលើវិស័យសំណង់ ឬអ្នកជំនាញផ្នែកស្ថាបត្យកម្ម បន្ត​ស្រាវជ្រាវរកធនធាន ឬវត្ថុធាតុដើមបន្ថែមដែលជារបស់ខ្មែរ ដើម្បីយក​ទៅ​កែច្នៃ​ធ្វើ​ជា​គ្រឿង​សំណង់ ដែលមានគុណភាពរឹងមាំ និងមានភាពធន់យូរអង្វែង ។

នៅក្នុងសិក្ខាសាលាស្តីពី គោលនយោបាយជាតិស្តីពី ឫស្សី នៅថ្ងៃទី១០ ខែកញ្ញា ឆ្នាំ២០២៤ ឯកឧត្តមឧបនាយករដ្ឋមន្ត្រី មានប្រសាសន៍ថា នៅកម្ពុជាមានធនធាន និងវត្ថុធាតុជាច្រើនប្រភេទ ដែល​អាចធ្វើជាគ្រឿងបង្គុំក្នុងវិស័យសំណង់ មានដូចជាឈើប្រណិត ថ្មភ្នំ ខ្សាច់ និងប្រភេទ​រ៉ែ​មួយ​ចំនួនទៀត ហើយធនធានទាំងអស់នោះ ត្រូវបានយកកសាងប្រាសាទអង្គរវត្ត ប្រាសាទបុរាណ ឬ​សំណង់ស្ថាបត្យកម្មជាច្រើនទៀត ។

ឯកឧត្តមបានបន្តថា មួយវិញទៀត សម្រាប់ធនធានមួយចំនួន ក៏ត្រូវបាននាំចេញផងដែរ ទៅ​កាន់​ទីផ្សារ​អន្តរជាតិ មានប្រទេសចិន និងសហរដ្ឋអាមេរិកជាដើម ប៉ុន្តែយ៉ាងណាគិតថានៅកម្ពុជា អាច​នឹងមានធនធានធម្មជាតិ ឬវត្ថុធាតុដើមផ្សេងៗ ដែលអាចយកទៅបង្គុំធ្វើជាគ្រឿងសំណង់ ដូច​នេះហើយ សូមលើកទឹកចិត្តដល់អ្នកពាក់ព័ន្ធ ធ្វើការសិក្សាស្រាវជ្រាវបន្ថែម ទៅលើអ្វី​ដែល​មាន​ស្រាប់។

ជាមួយនេះ ឯកឧត្តម សាយ សំអាល់ ក៏បានជំរុញទៅវិស័យនានា បន្តកែច្នៃឫស្សី បម្រើ​ក្នុង​វិស័យ​សំណង់ ធ្វើជាឧបករណ៍ ឬសម្ភារសម្រាប់ប្រើប្រាស់ ព្រោះនៅកម្ពុជាក៏មានឫស្សីជាច្រើនប្រភេទ ខណៈ​បច្ចុប្បន្នប្រភេទឈើ ដែលអាចធ្វើជាគ្រឿងបង្គុំកសាងសំណង់ មានដូចជា ឫស្សី ក្រាក់ និងស្មាច់។ មួយវិញទៀតឫស្សី ក៏ត្រូវបានទីតាំងបម្រើក្នុងវិស័យទេសចរណ៍ មានដូចជាសណ្ឋាគារ ឬ​ភោជនីយដ្ឋានជាដើម យកតុបតែកែលម្អជាការទាក់ទាញមួយផងដែរ ។

គួរបញ្ជាក់ថា ក្នុងគោលនយោបាយជាតិស្តីពី ឫស្សី បានឲ្យដឹងថា ស្ថានភាពបច្ចុប្បន្ន និង​ត​ទៅ​អនាគត​ដំណាំឫស្សី ដែលជាដំណាំធំទីបួន បន្ទាប់ពីស្រូវ ដំឡូងមី ស្វាយចន្ទី ត្រូវមាន​ការ​គាំទ្រ​ពិសេស ដើម្បីទាញយកប្រយោជន៍ ឲ្យបានជាអតិបរមា និងការអភិវឌ្ឍដំណាំនេះ ឲ្យក្លាយ​ជាក​ម្លាំង​ចលករដ៏ខ្លាំងក្លាមួយ ក្នុងការធ្វើបដិវត្តន៍កសិ-ឧស្សាហកម្មនៅកម្ពុជា ដែលទិសដៅនេះ បាន​កំណត់​យ៉ាងជាក់ច្បាស់ ក្នុងគោលនយោបាយអភិវឌ្ឍន៍ឧស្សាហកម្ម ឆ្នាំ២០២១-២០២៥ ។

មួយវិញទៀត ការបង្កើតសមត្ថភាពកែច្នៃ ផលិតផលសម្រេចចេញពីឫស្សី ដើម្បីជំរុញ​ការ​នាំ​ចេញ​ពី​កម្ពុជា​ដោយផ្ទាល់ ទៅកាន់ទីផ្សារក្នុងស្រុក តំបន់ និងពិភពលោក នាំត្រឡប់មក​វិញ​នូវ​រូបិយ​បណ្ណ​អន្តរជាតិ ព្រមទាំងជំរុញឲ្យមានការកសាងបណ្ដាញតភ្ជាប់ ជាមួយអនុវិស័យ កសិកម្ម និង​ឧស្សាហកម្មក្នុងស្រុកផ្សេងៗ ជាច្រើនទៀត ដែល​បង្កើត​បាន​នូវ​ប្រព័ន្ធ​សេដ្ឋកិច្ច​ប្រទាក់​ក្រឡា​ដ៏​រស់​រវើក៕ អត្ថបទ៖ បាន សុខរិទ្ធិ