រដ្ឋមន្ត្រីការពារជាតិស៊ុយអែត លោក Pal Jonson កាលពីថ្ងៃចន្ទ (ទី៩ ខែកញ្ញា) បាននិយាយថា ប្រទេសស៊ុយអែតនឹងបញ្ជូនកញ្ចប់ជំនួយទី១៧ របស់ខ្លួន ទៅកាន់ប្រទេសអ៊ុយក្រែន ជាមួយនឹងជំនួយផ្នែកយោធាបន្ថែមទៀត ដែលមានទឹកប្រាក់សរុបចំនួន ៤,៦ពាន់លានក្រោនស៊ុយអ៊ែត (៤៤៣លានដុល្លារ)។

កញ្ចប់ជំនួយថ្មីនេះ នឹងរួមបញ្ចូលគ្រាប់រំសេវ សម្រាប់រថយន្តប្រយុទ្ធថ្មើរជើង ដែលបានបរិច្ចាគរួចហើយដោយប្រទេសស៊ុយអែត ក៏ដូចជាការទិញដែលនឹងជួយសម្រួលដល់ការបញ្ជូនយន្តហោះចម្បាំង Gripen នាពេលខាងមុខ ទោះបីជាមិនទាន់មានការសម្រេចលើការបញ្ជូននេះក៏ដោយ។

លោក Jonson បានប្រាប់សន្និសីទសារព័ត៌មានមួយថា៖ «យើងចង់មានលទ្ធភាពបរិច្ចាគយន្តហោះចម្បាំង Gripen ដល់អ៊ុយក្រែន នាពេលក្រោយ ក្នុងដំណាក់កាលដែលអាចធ្វើទៅបាន»។

លោក Jonson បាននិយាយថា ការគាំទ្រ រួមមានទូកប្រយុទ្ធ មីស៊ីល និងឧបករណ៍ក្លែងបន្លំខ្លួន ក៏ដូចជាការផ្តល់មូលនិធិសម្រាប់គាំទ្រលទ្ធកម្មការពារជាតិសម្រាប់អ៊ុយក្រែន។ វិធានការត្រូវបានសម្រេចដោយការសហការយ៉ាងជិតស្និទ្ធជាមួយទីក្រុងគីវ។

ប្រហែលពាក់កណ្តាលនៃតម្លៃរបស់កញ្ចប់ជំនួយនេះ មានទាំងផ្នែកដែលត្រូវការនៅក្នុងការផលិតយន្តហោះចម្បាំងម៉ូដែលចុងក្រោយបង្អស់ Gripen E របស់ស៊ុយអែត សម្រាប់កម្លាំងទ័ពអាកាសរបស់ប្រទេសនេះផងដែរ៕