ប្រធានាធិបតីអេហ្ស៊ីប លោក អាប់ដែល ហ្វាតា អាល់ស៊ីស៊ី ( Abdel-Fattah al-Sisi) និងលោក ចូសិប បូរ៉ែល (Josep Borrell) តំណាងជាន់ខ្ពស់ទទួលបន្ទុកកិច្ចការបរទេស និងគោលនយោបាយសន្តិសុខរបស់សហភាពអឺរ៉ុបកាលពីថ្ងៃចន្ទ បានពិភាក្សាគ្នាអំពីស្ថានភាពនៅតំបន់ហ្កាហ្សាស្ទ្រីប និងផលប៉ះពាល់ក្នុងតំបន់។ នេះបើសេចក្តីថ្លែងការណ៍របស់ការិយាល័យប្រធានាធិបតីអេហ្ស៊ីប។ 

សេចក្តីថ្លែងការណ៍ បាននិយាយថា ក្នុងអំឡុងពេលនៃកិច្ចប្រជុំនោះ លោក ស៊ីស៊ី និង លោក បូរ៉ែល បានលើកឡើងពីកិច្ចខិតខំប្រឹងប្រែងយ៉ាងយកចិត្តទុកដាក់របស់ប្រទេសអេហ្ស៊ីប ដើម្បីឈានដល់បទឈប់បាញ់ និងធានាបាននូវការដោះលែងអ្នកជាប់ឃុំ និងចំណាប់ថ្នូរទាំងអស់ ។

សេចក្តីថ្លែងការណ៍ បានបន្ថែមថា បទឈប់បាញ់នៅតំបន់ហ្កាហ្សា នឹងត្រួសត្រាយផ្លូវសម្រាប់ដំណោះស្រាយរដ្ឋពីរ ដែលនឹងជួយក្នុងការបើកលំហសម្រាប់សន្តិភាព ទំនាក់ទំនងសន្តិវិជ្ជមាន ស្ថិរភាព និងការអភិវឌ្ឍក្នុងតំបន់។

ប្រធានាធិបតីអេហ្ស៊ីប បានព្រមានពីគ្រោះថ្នាក់នៃការកើនឡើងជាបន្តបន្ទាប់ ដែលនឹងពង្រីកជម្លោះបន្ថែមទៀត។

លោកបានអំពាវនាវ សហគមន៍អន្តរជាតិ និងសហភាពអឺរ៉ុប បង្កើនកិច្ចខិតខំប្រឹងប្រែង ដើម្បីឈានដល់កិច្ចព្រមព្រៀងបទឈប់បាញ់នៅតំបន់ហ្កហ្សាស្ទ្រីប និងបញ្ឈប់អំពើហិង្សា នៅតំបន់វេសបែង ( West Bank) ដែលនឹងបន្ធូរបន្ថយភាពតានតឹងក្នុងតំបន់ និងស្ដារសន្តិភាព និងសន្តិសុខឡើងវិញ។

សម្រាប់ផ្នែករបស់ខ្លួន លោក បូរ៉ែល បានសរសើរតួនាទីដ៏សំខាន់របស់អេហ្ស៊ីប ក្នុងការលើកកម្ពស់ស្ថិរភាពក្នុងតំបន់ និងបានសង្កត់ធ្ងន់ទៅលើភាពខ្នះខ្នែងរបស់សហភាពអឺរ៉ុប ក្នុងការរក្សាការពិគ្រោះយោបល់ជាបន្តជាមួយអេហ្ស៊ីប ក្នុងអំឡុងពេលដ៏សំខាន់នេះ។