ជនជាតិដើមភាគតិចនៅរដ្ឋភាគពាយ័ព្យ Lambayeque ប្រទេសប៉េរូ បានព្យាយាមពន្លត់ភ្លើងឆេះព្រៃ ។

លោក Melvin Rodriguez គឺជាប្រធានមជ្ឈមណ្ឌលប្រតិបត្តិការសង្រ្គោះបន្ទាន់ក្នុងតំបន់នៅរដ្ឋ Lambayeque បាននិយាយថា ភ្លើងឆេះព្រៃនេះ កំពុងគំរាមកំហែងដល់ដើមស្រល់ចំនួន ៦៤.០០០ដើម ហើយនិងធ្វើឲ្យខូចខាតធ្ងន់ធ្ងរដល់សេដ្ឋកិច្ចក្នុងស្រុក ។

ទីភ្នាក់ងារព័ត៌មានក្នុងស្រុក Andina រាយការណ៍ថា ភ្លើងឆេះព្រៃ បានសម្លាប់មនុស្សម្នាក់ និងមនុស្ស ១៦នាក់ផ្សេងទៀត បានស្រូបយកផ្សែងពុលនៅរដ្ឋ Lambayeque ។

ក្រុមអាជ្ញាធរ បានស្នើឲ្យប្រជាពលរដ្ឋរស់នៅក្នុងស្រុក Incahuasi ជម្លៀសខ្លួនចេញ និងស្វែងរកការគាំទ្រពីកងកម្លាំងទ័ពអាកាសប៉េរូ ដើម្បីទប់ទល់នឹងភ្លើងឆេះព្រៃ ។

សេវាកម្មឧតុនិយម និងជលសាស្ត្រជាតិប៉េរូ បានចេញការព្រមានថា ស្ថានភាពអាកាសធាតុពុំអំណោយផលនៅក្នុងសប្តាហ៍នេះ អាចនឹងធ្វើឲ្យភ្លើងឆេះព្រៃកាន់តែធ្ងន់ធ្ងរខ្លាំងជាងនេះ ៕