លោក Yahya Saree គឺជាអ្នកនាំពាក្យរបស់ក្រុមឧទ្ទាមហ៊ូទីរបស់យេម៉ែន បាននិយាយនៅថ្ងៃអង្គារនេះថា ពួកគេបានបាញ់ទម្លាក់យានដ្រូន MQ-9 របស់អាមេរិកនៅខេត្ត Saada ។

នៅក្នុងសេចក្តីថ្លែងការណ៍លើកញ្ចក់ទូរទស្សន៍ លោក Saree និយាយថា យានដ្រូននេះ បានចុះប្រតិបត្តិការចារកម្មអរិភាព និងប្រតិបត្តិការប្រយុទ្ធ ពេលដែលវាត្រូវបានបាញ់ទម្លាក់ ។

អ្នកនាំពាក្យក្រុមឧទ្ទាមហ៊ូទីគាំទ្រដោយអ៊ីរ៉ង់រូបនេះ បានអះអាងថា នេះគឺជាយានដ្រូនទី ២ ត្រូវបានបាញ់ទម្លាក់ដោយកងកម្លាំងរបស់ពួកគេ ក្នុងរយៈពេល ៧២ម៉ោងចុងក្រោយនេះ និងជាយានដ្រូនទី ៩ ចាប់តាំងពីការចាប់ផ្តើមយុទ្ធនាការគាំទ្រសង្រ្គាមហ្កាហ្សា ។

ក្រុមឧទ្ទាមហ៊ូទី បានបើកការវាយប្រហារជាង ៧០លើកលើនាវាពាណិជ្ជកម្មនៅសមុទ្រក្រហម ដើម្បីបង្ហាញសាមគ្គីភាពជាមួយជនប៉ាឡេស្ទីន ក្នុងសង្រ្គាមរវាងអ៊ីស្រាអែល និងក្រុមជីវពលហាម៉ាស់ នៅតំបន់ហ្កាហ្សា ៕