រដ្ឋមន្ត្រីសុខាភិបាលម៉ាឡេស៊ី លោក Dzulkefly Ahmad នៅថ្ងៃអង្គា (ទី១០ ខែកញ្ញា) នេះ បាននិយាយថា នឹងមិនមានការបិទខ្ទប់ទូទាំងប្រទេស ដើម្បីការពារជំងឺអុតស្វា ឬអឹមផក (Mpox) ដូចអ្វីដែលបានកើតមានក្នុងអំឡុងពេលមានជំងឺរាតត្បាតកូវីដ-១៩ នោះទេ។

លោកបានប្រាប់ថា រដ្ឋាភិបាលកំពុងចាត់វិធានការគ្រប់បែបយ៉ាងដែលចាំបាច់ ដើម្បីធ្វើឲ្យជំងឺនេះមិនមានឆ្លងនៅក្នុងប្រទេស និងបានច្រានចោលការបិទប្រទេស ដូចជាបទបញ្ជាគ្រប់គ្រងការរាលដាល (MCO) ដែលត្រូវបានចេញក្នុងអំឡុងពេលមានជំងឺរាតត្បាត។

លោក Dzulkefly បានបន្តថា វិធានការប្រឆាំងនឹងជំងឺ Mpox រួមមានការត្រួតពិនិត្យសុខភាពយ៉ាងតឹងរ៉ឹងលើអ្នកធ្វើដំណើរអន្តរជាតិដែលចូលមកក្នុងប្រទេស ដោយមានមនុស្សជាង ៦លាននាក់ ត្រូវបានត្រួតពិនិត្យរួចហើយ មកទល់ពេលនេះ។ លោកបានបន្ថែមថា នីតិវិធីនេះ ពាក់ព័ន្ធនឹងការពិនិត្យនៅត្រង់កន្លែងចូលជាអន្តរជាតិទាំងអស់ ដែលមានតាមសមុទ្រ ផ្លូវអាកាស និងផ្លូវគោក។

លោក Dzulkefly បានឲ្យដឹងថា៖ «ក្នុងចំណោមអ្នកដំណើរ ៦លាននាក់ ដែលត្រូវបានពិនិត្យរហូតមកដល់ពេលនេះ ៥២នាក់ គឺជាករណីសង្ស័យ ប៉ុន្តែចាប់តាំងពីពេលនោះមក បានធ្វើតេស្តអវិជ្ជមាន។ ជាលទ្ធផល រហូតមកដល់ពេលនេះ មិនទាន់មានករណីវិជ្ជមាននៃជំងឺ Mpox លេចឡើងនៅក្នុងប្រទេសរបស់យើងនោះទេ»។

គួរបញ្ជាក់ថា រហូតមកដល់ពេលនេះ វីរុសបំប្លែងថ្មីនៃជំងឺ Mpox បានបង្ហាញវត្តមាន ក្នុងចំនួនមានកំណត់ នៅក្នុងប្រទេសសិង្ហបុរី ឥណ្ឌូនេស៊ី ហ្វីលីពីន និងប្រទេសថៃ៕