ភ្នំពេញ៖ សាលាដំបូងរាជធានីភ្នំពេញ បានចេញដីកាមួយសម្រេចលើកលែងការចោទប្រកាន់ និងបញ្ឈប់ការចាប់ខ្លួនលោក សេង សារី ដែលជាអ្នកវិភាគ និងស្រាវជ្រាវអំពីព្រឹត្តិការណ៍នយោបាយក្រោយពីមានការអំពាវនាវពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បន្ទាប់ពីសម្តេចបានស្តាប់នូវការបកស្រាយរបស់អ្នកវិភាគរូបនេះសមហេតុសមផល ក្នុងរឿងរ៉ាវវិភាគមួយបែបសេនារិយោទាក់ទងនឹងក្រុមឧទ្ទាមក្រៅច្បាប់កាលពីកន្លងទៅថ្មីៗនេះ។
យោងតាមដីកាបញ្ឈប់ឲ្យចាប់ខ្លួនរបស់លោក ញឹម ពិសាល ដែលបានចេញនៅថ្ងៃទី២១ ខែកញ្ញា ឆ្នាំ២០២១នេះ បានឲ្យដឹងថា ក្រោយបានពិនិត្យលើសំណុំរឿងចប់សព្វគ្រប់ហើយនោះ ឈ្មោះសេង សារី ភេទប្រុស កើតនៅថ្ងៃទី៧ ខែតុលា ឆ្នាំ១៩៧៩ ដែលមានអត្តសញ្ញាណប័ណ្ណលេខ១៦០៣៥៤០៧៦ ទីកន្លែងកំណើតនៅភូមិស្តៅ ឃុំស្តៅ ស្រុកស្តៅ ខេត្តបាត់ដំបង ហើយមានទីលំនៅបច្ចុប្បន្ននៅភូមិតាស្តី ឃុំវាល ស្រុកកណ្តៀង ខេត្តពោធិសាត់ មុខរបរ សាស្រ្តាចារ្យនៅសកលវិទ្យាល័យមានជ័យ ខេត្តបន្ទាយមានជ័យ និងជាអ្នកស្រាវជ្រាវ និងឃ្លាំមើលការអភិវឌ្ឍសង្គម ហើយត្រូវបានចោទប្រកាន់ពីបទ«រួមគំនិតក្បត់ និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ប្រព្រឹត្តនៅព្រះរាជាណាចក្រកម្ពុជា និងទីកន្លែងផ្សេងទៀត កាលពីថ្ងៃទី១៧ ថ្ងៃទី២០ ថ្ងៃទី២១ ខែកក្កដា ឆ្នាំ២០២១និងអំឡុង ពេលបន្តបន្ទាប់ បទល្មើសព្រហ្មទណ្ឌដែលមានចែងឲ្យផ្តន្ទាទោសតាមបញ្ញាត្តិមាត្រា៤៥៣មាត្រា៤៩៤ នៃក្រមព្រហ្មទណ្ឌ។
ដីកានេះបានបញ្ជាក់បន្ថែមទៀតថា «តាមដីកាលើកលែងចោទប្រកាន់លេខ ៤៥៦០ “ល” ដ.ដ ចុះថ្ងៃទី២១ ខែកញ្ញា ឆ្នាំ២០២១ របស់ចៅក្រមស៊ើបសួរសាលាដំបូងរាជធានីភ្នំពេញ បានសម្រេចលើកលែងការចោទប្រកាន់លើជនត្រូវចោទឈ្មោះ សេង សារី ភេទប្រុស កើតថ្ងៃទី០៧ ខែតុលា ឆ្នាំ១៩៧៩ ដែលមានអត្តសញ្ញាណដូចខាងលើរួចហើយ គប្បីបញ្ឈប់ដីកាបង្គាប់ឱ្យចាប់ខ្លួនលេខ ៦៨៩ “ល” ដ.ច.ន ចុះថ្ងៃទី០៥ ខែសីហា ឆ្នាំ២០២១ លើជនត្រូវចោទខាងលើនេះ»។
តាមរយៈទំព័រសង្គមហ្វេសប៊ុក កាលពីព្រឹកថ្ងៃទី២០ ខែកញ្ញានេះម្សិលមិញនេះ សម្តេចតេជោ ហ៊ុន ដែន បាន សរសេរថា ក្រោយពីបានស្តាប់ដោយយកចិត្តទុកដាក់នូវការសម្ភាសន៍របស់លោកបណ្ឌិត សេង សារី ជា មួយកាសែត The Cambodia Daily នៅថ្ងៃទី១៨ ខែកញ្ញានេះ បកស្រាយពន្យល់អំពីគោលបំណង នៃការវិភាគអំពីសេនារីយោ៦ចំណុច កាលពីថ្ងៃទី២១ ខែកក្កដា ឆ្នាំ២០២១ ថា «ជាការវិភាគបែបសេនារីយោ» ហើយដែលការបកស្រាយនេះ មានលក្ខណៈសមហេតុផល និងអាចទទួលយកបាននោះ ក្នុងនាមប្រមុខ នៃរាជរដ្ធាភិបាលកម្ពុជា សម្តេចសូមអំពាវនាវឱ្យស្ថាប័នតុលាការ ពិនិត្យពិចារណាក្នុងការបញ្ឈប់ដីកាចាប់ ខ្លួនលោក បណ្ឌិត សេង សារី។
ជាមួយនឹងសារតាមហ្វេសបុកនោះដែរ សម្តេចតេជោនាយករដ្ឋមន្រ្តី ក៏បានលើកទឹកចិត្ត ដល់លោកបណ្ឌិត សេង សារី ឱ្យបន្តកិច្ចការស្រាវជ្រាវ និងវិភាគបញ្ហាសង្គមបន្តទៀត ដើម្បីជាប្រយោជន៍ដល់ការសិក្សាស្រាវជ្រាវផ្នែកវិទ្យាសាស្ត្រសង្គម។ សម្តេចតេជោ ក៏បានអំពាវនាវដល់ភរិយា កូន និងឪពុកម្តាយ របស់បណ្ឌិត សេង សារី កុំឱ្យមានការ ព្រួយបារម្ភផងដែរ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
