ប្រមុខសេវាចារកម្មបរទេសរបស់ប្រទេសន័រវ៉ែស មានជំនឿថា រុស្ស៊ីទំនងជាព្យាយាមបង្កការបំផ្លិចបំផ្លាញដល់ហេដ្ឋារចនាសម្ព័ន្ធរបស់ខ្លួន ដូចជាប្រេង និងឧស្ម័ន ជាងមួយឆ្នាំមុន ខណៈប្រទេសនេះកាន់តែបង្ហាញនូវការឥតញញើតខ្លាំងឡើងៗ ក្នុងការប្រឆាំងនឹងការគាំទ្ររបស់លោកខាងលិច ចំពោះអ៊ុយក្រែន។

អនុឧត្តមនាវីឯក លោក Nils Andreas Stensoenes ប្រមុខសេវាស៊ើបការណ៍សម្ងាត់ន័រវ៉ែស (NIS) បានប្រាប់សារព័ត៌មាន Reuters ថា៖ «កម្រិតហានិភ័យបានប្រែប្រួល។ យើងជឿថា អំពើវិឆ្ឆេទកម្ម គឺទំនងជាមានហើយយើងឃើញសកម្មភាពនៃការបំផ្លិចបំផ្លាញកើតឡើងនៅអឺរ៉ុប ដែលឥឡូវនេះបង្ហាញថា ពួកគេ (រុស្ស៊ី) បានធ្វើសកម្មភាពតិចតួចលើទំហំនោះ»។

រុស្ស៊ីបដិសេធការចោទប្រកាន់បែបនេះ ដោយលើកឡើងថា ជាការបំភ័យរបស់លោកខាងលិច។ ស្ថានទូតរបស់ប្រទេសនេះ ប្រចាំនៅទីក្រុង Oslo មិនអាចទាក់ទងបានភ្លាមៗនោះឡើយ ដើម្បីសុំការអត្ថាធិប្បាយ។

គួរបញ្ជាក់ថា ដើមឆ្នាំនេះ ទីភ្នាក់ងារស៊ើបការណ៍សម្ងាត់របស់ប្រទេសន័រវ៉ែស បានវាយតម្លៃថា រុស្ស៊ី «អាចយល់ថា នេះជាសកម្មភាពដ៏វៃឆ្លាត» ក្នុងការអនុវត្តអំពើវិឆ្ឆេទកម្ម ដោយប្រេងឥន្ធនៈក្លាយជាគោលដៅចម្បង ខណៈកាលពីឆ្នាំមុន ពួកគេបានសន្និដ្ឋានថា មិនទំនងជាមានអំពើនោះ។ ប្រទេសន័រវ៉ែស គឺជាអ្នកផ្គង់ផ្គង់ឧស្ម័នដ៏ធំបំផុតរបស់អឺរ៉ុប និងជាអ្នកនាំចេញប្រេងឆៅដ៏ធំផងដែរ៕