លោក Dmitry Peskov គឺជាអ្នកនាំពាក្យរបស់វិមានក្រឹមឡាំង និយាយថា ការវាយប្រហារដោយយានដ្រូនទ្រង់ទ្រាយធំលើទីក្រុងម៉ូស្គូនៅថ្ងៃអង្គារនេះ បង្ហាញថា របបក្រុងគីវ គឺជាសត្រូវរបស់រុស្ស៊ី ហើយរុស្ស៊ីត្រូវតែបន្តសង្រ្គាមរបស់ខ្លួន។

អ៊ុយក្រែន បានវាយប្រហារទីក្រុងម៉ូស្គូនាថ្ងៃអង្គារនេះ នៅក្នុងការវាយប្រហារដោយយានដ្រូនធំបំផុតរបស់ខ្លួន មកទល់នឹងពេលនេះ លើរដ្ឋធានីរបស់រុស្ស៊ីមួយនេះ ដោយបានសម្លាប់ស្រ្តីម្នាក់ បំផ្លិចបំផ្លាញផ្ទះសម្បែងពលរដ្ឋជាច្រើនខ្នង និងបង្ខំឲ្យជើងហោះហើរប្រហែល ៥០វ៉ុល បង្វែរទិសដៅហោះហើររបស់ខ្លួនចេញពីអាកាសយានដ្ឋាននៅជុំវិញទីក្រុងម៉ូស្គូ ។

ចំណែកឯរុស្ស៊ីខ្លួនឯងផ្ទាល់ បានវាយប្រហារអ៊ុយក្រែនដូចគ្នាក្នុងខែនេះ ជាមួយនឹងការវាយប្រហារទ្រង់ទ្រាយធំបំផុត និងស្លាប់មនុស្សច្រើនបំផុត ចាប់តាំងពីសង្រ្គាមផ្ទុះឡើង ។

លោក Peskov និយាយផងដែរថា ស្របពេលដែលទាហានអ៊ុយក្រែន បន្តវត្តមាននៅតំបន់ Kursk របស់រុស្ស៊ី ទីក្រុងម៉ូស្គូ មិនអាចគិតដល់កិច្ចចរចាណាមួយជាមួយទីក្រុងគីវបានឡើយ ហើយពួកគេនឹងបន្តអ្វីដែលពួកគេចាត់ទុកថាជាប្រតិបត្តិការសឹកពិសេសរបស់ខ្លួន ៕