យុទ្ធនាការផ្តល់វ៉ាក់សាំងបង្ការជំងឺស្វិតដៃជើងដល់កុមារ ២០ម៉ឺននាក់ចុងក្រោយនៅភាគខាងជើងតំបន់ហ្កាហ្សា បានចាប់ផ្តើមនៅថ្ងៃអង្គារនេះ បើទោះបីជាក្រុមមន្រ្តីជំនួយ និងក្រុមមន្រ្តីសុខភាព និយាយថា ប្រតិបត្តិការរបស់ពួកគេ មានលក្ខណៈស្មុគស្មាញខ្លាំង ដោយសារការរឹតត្បិតការចូលដល់ ការបញ្ជាឲ្យជម្លៀសខ្លួន និងកង្វះខាតប្រេងឥន្ធនៈ ។

យុទ្ធនាការនៅភាគខាងជើងតំបន់ហ្កាហ្សា ដែលជាតំបន់រងផលប៉ះពាល់ខ្លាំងបំផុតដោយសារការវាយប្រហាររយៈពេល ១១ខែរបស់អ៊ីស្រាអែលលើក្រុមជីវពលហាម៉ាស់នោះ បានធ្វើឡើង បន្ទាប់ពីការផ្តល់វ៉ាក់សាំងដល់កុមារប៉ាឡេស្ទីនជាង ៤៤៦.០០០នាក់ នៅតំបន់ភាគកណ្តាល និងតំបន់ភាគខាងត្បូងហ្កាហ្សា កាលពីដើមខែនេះ ។

នៅក្នុងមណ្ឌលសុខភាពមួយក្នុងចំណោមមណ្ឌលសុខភាពជាច្រើនទៀតនៅទីក្រុង Jabalia ក្មេងៗ បានធ្វើដំណើរមកជាមួយឪពុកម្តាយ និងសាច់ញាតិរបស់ពួកគេ រង់ចាំដល់វេនទទួលវ៉ាក់សាំងរបស់ពួកគេ ។

លោក Hossam Medhat Saleh បាននាំកូនៗរបស់លោកមកកាន់មណ្ឌលសុខភាព Abu Shabak ។

លោក Saleh និយាយថា ថ្ងៃនេះ ពួកយើងទទួលបានការផ្តល់វ៉ាក់សាំង ប៉ុន្តែអ្វីទៅជាការចំណេញពីការផ្តល់វ៉ាក់សាំងនៅថ្ងៃនេះ ពេលដែលមានរការបញ្ជាឲ្យជម្លៀសខ្លួនបែបនេះ ។

យោងតាមការធ្វើបច្ចុប្បន្នភាពរបស់អង្គការសហប្រជាជាតិ(UN)កាលពីថ្ងៃចន្ទ បានឲ្យដឹងថា អ៊ីស្រាអែល បានចេញបញ្ជាឲ្យជម្លៀសខ្លួននៅតំបន់ភាគខាងជើងហ្កាហ្សាជាលើកដំបូងក្នុងរយៈពេលជាង ២សប្តាហ៍កន្លងមកនេះ ដែលរួមទាំងតំបន់ផ្អាកសង្រ្គាមមនុស្សធម៌ ដើម្បីផ្តល់វ៉ាក់សាំងបង្ការជំងឺស្វិតដៃជើងផងដែរ ៕