ស៊ីហ្គេម៖ ការប្រកួតកីឡាស៊ីហ្គេមលើកទី៣១ នៅទីក្រុងហាណូយកំពុងប្រឈមនឹងការលុបចោលជាប្រវត្តិសាស្ដ្រ ប្រសិនបើម្ចាស់ផ្ទះវៀតណាមនៅតែស្ទាក់ស្ទើរ និងមិនមានការកំណត់ពេលវេលាច្បាស់លាស់ដើម្បីរៀបចំ ស្របពេលក្រុមប្រឹក្សាកីឡាអាស៊ីអាគ្នេយ៍ និងបណ្ដាសមាជិកមិនអាចរង់ចាំចំពោះការអូសបន្លាយនេះទៀតឡើយ។ នេះបើតាមការបញ្ជាក់របស់ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា។
ឯកឧត្តម វ៉ាត់ ចំរើន បានមានប្រសាសន៍ថា ទោះបីវៀតណាមបានជ្រើសរើសយកសេណារីយ៉ូទី២ ក្នុងការពន្យារពេលរៀបចំស៊ីហ្គេមពីចុងឆ្នាំ២០២១ ទៅខែមេសា ឬខែឧសភា ឆ្នាំ២០២២ ដែលវៀតណាមនៅមិនទាន់កំណត់កាលបរិច្ឆេទរៀបចំច្បាស់លាស់ឡើយ។ ការណ៍នេះបានធ្វើឲ្យបណ្ដាប្រទេសសមាជិក ពិសេសក្រុមប្រឹក្សាកីឡាអាស៊ីអាគ្នេយ៍មិនអាចរង់ចាំទៀតបាន ហើយបានសម្រេចទុកលក្ខភាពឲ្យវៀតណាមត្រឹមខែតុលាខាងមុខ ដើម្បីសម្រេចចិត្តថា រៀបចំនៅពេលណា? ប្រសិនបើមិនមានការសម្រេចណាមួយនោះទេ ព្រឹត្តិការណ៍លើកទី៣១ នេះ នឹងត្រូវប្រឈមនឹងការលុបចោលជាប្រវត្តិសាស្ដ្រតែម្ដង។ អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) ដដែលបន្ដថា ក្នុងនាមសមាជិកស៊ីហ្គេមក៏មិនខុសពីបណ្ដាប្រទេសផ្សេងៗដែរ កម្ពុជាមិនអាចរង់ចាំទៀតនោះទេ ពិសេសក្នុងនាមម្ចាស់ផ្ទះបន្ដវេណត្រូវការចាំបាច់នូវការផ្ទេរសិទ្ធជាប្រធាន ដើម្បីបញ្ចៀសនូវការរាំងស្ទះដល់ដំណើរការរៀបចំធ្វើជាម្ចាស់ផ្ទះស៊ីហ្គេម។ ប៉ុន្ដែយ៉ាងណាក្នុងនាមសមាជិកអាស៊ាននឹងត្រូវមានការសម្របសម្រួលគ្នាដោយសន្ដិវិធី ព្រោះក្នុងអាស៊ានមានសាមគ្គីភាព និងមានឯកភាពផ្ទៃក្នុងល្អ ដូច្នេះនឹងមានការជជែកគ្នាតាមសម្រួល ផ្ដល់យោបល់ឲ្យគ្នាដើម្បីរកដំណោះស្រាយមួយដ៏ល្អ តែក៏ត្រូវគោរពទៅតាមច្បាប់ និងធម្មនុញ្ញរបស់ស៊ីហ្គេមផងដែរ។
គួរដឹងថា ស៊ីហ្គេមលើកទី៣២ នៅវៀតណាមដំបូងឡើងត្រូវរៀបចំការប្រកួតពីថ្ងៃទី២១ ខែវិច្ឆិកាដល់ថ្ងៃទី២ ខែធ្នូ ឆ្នាំ២០២១ ខាងមុខ។ ប៉ុន្ដែដោយសារការរីករាលដាលខ្លាំងនៃជំងឺកូវីដ-១៩ វៀតណាមក៏បានផ្ញើលិខិតទៅកាន់គណៈកម្មាធិការជាតិអូឡាំពិកគ្រប់បណ្ដាប្រទេសនៅអាស៊ាន ដើម្បីស្នើសុំពន្យារពេលរៀបចំព្រឹត្តិការណ៍ប្រចាំតំបន់នេះ ដោយវៀតណាមបានជ្រើសរើសយកសេណារីយ៉ូទី២ គឺការលើកពេលទៅរៀបចំនាខែមេសា ឬខែឧសភា ឆ្នាំ២០២២ តែមកទល់ពេលនេះវៀតណាមនៅមិនទាន់កំណត់ កាលបរិច្ឆេទរៀបចំច្បាស់លាស់នោះទេ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
