អង្គការសហប្រជាជាតិ បាននិយាយកាលពីថ្ងៃអង្គារថា ក្បួនរថយន្តរបស់អង្គការសហប្រជាជាតិដែលមានស្លាកសញ្ញាច្បាស់លាស់នៅក្នុងតំបន់ហ្កាហ្សា ត្រូវបានហ៊ុមព័ទ្ធនិងភ្ជុងកាំភ្លើងដាក់ ដោយកងកម្លាំងអ៊ីស្រាអែល ដែលបានព្យាយាមសាកសួរបុគ្គលិកអង្គការសហប្រជាជាតិពីរនាក់។

អ្នកនាំពាក្យអង្គការសហប្រជាជាតិ លោក Stephane Dujarric បាននិយាយកាលពីថ្ងៃអង្គារថា ក្បួនរថយន្ត ដែលកំពុងធ្វើដំណើរដើម្បីជួយដល់យុទ្ធនាការចាក់វ៉ាក់សាំងកុមារប៉ាឡេស្ទីនរាប់ពាន់នាក់ប្រឆាំងជំងឺស្វិតដៃជើង ត្រូវបានបញ្ឈប់នៅប៉ុស្តិ៍ត្រួតពិនិត្យមួយកន្លែង ដែលភ្ជាប់តំបន់ហ្កាហ្សាភាគកណ្តាល និងភាគខាងជើង ដោយសារទាហានអ៊ីស្រាអែល ចង់សាកសួរបុគ្គលិកជាពលរដ្ឋប៉ាឡេស្ទីនពីរនាក់។

លោកបាននិយាយថា ស្ថានការណ៍កើនឡើងយ៉ាងឆាប់រហ័ស ហើយទាហានបានភ្ជុងអាវុធរបស់ពួកគេទៅកាន់បុគ្គលិកអង្គការសហប្រជាជាតិនៅក្នុងក្បួនរថយន្ត។

ខណៈយុទ្ធនាការចាក់វ៉ាក់សាំងការពារជំងឺស្វិតដៃជើង បានចាប់ផ្តើមនៅភាគខាងជើងតំបន់ហ្កាហ្សាកាលពីថ្ងៃអង្គារ លោក Dujarric បាននិយាយថាឧបទ្ទវហេតុ គឺជាគំរូចុងក្រោយនៃ «គ្រោះថ្នាក់ និងឧបសគ្គ ដែលមិនអាចទទួលយកបានដែលបុគ្គលិកមនុស្សធម៌នៅតំបន់ហ្កាហ្សាកំពុងជួបប្រទះ» ។

លោកបាននិយាយថា ក្បួនរថយន្តរបស់អង្គការសហប្រជាជាតិ ត្រូវបានហ៊ុមព័ទ្ធដោយកងកម្លាំងអ៊ីស្រាអែលភ្លាមៗ។ ក្រោយមក ក្បួនរថយន្ត ត្រូវបានរថក្រោះនិងគ្រឿងចក្រឈូសឆាយ របស់កងកម្លាំងការពារជាតិអ៊ីស្រាអែលចូលមកជិត ដែលបានរុញបុករថយន្តរបស់អង្គការសហប្រជាជាតិពីខាងក្រោយ និងខាងមុខ ។

លោកបាននិយាយថា គ្រឿងចក្រឈូសឆាយមួយគ្រឿង បានទម្លាក់កម្ទេចកម្ទីទៅលើរថយន្តដំបូង ខណៈ ទាហានអ៊ីស្រាអែលបានគំរាមកំហែងបុគ្គលិក ដែលធ្វើឱ្យបុគ្គលិកមិនអាចចាកចេញពីរថយន្ត ដោយសុវត្ថិភាពបាន។

នៅពេលត្រូវបានសួរឱ្យឆ្លើយតបដល់អង្គការសហប្រជាជាតិកាលពីថ្ងៃអង្គារ យោធាអ៊ីស្រាអែល បាននិយាយថា ក្បួនរថយន្តត្រូវបានបញ្ឈប់ បន្ទាប់ពីយោធា ទទួលបានការស៊ើបការណ៍ដែលបង្ហាញថា «ជនសង្ស័យប៉ាឡេស្ទីន» មួយចំនួនជិះនៅលើរថយន្ត ដែលខ្លួនមានបំណងសាកសួរ។