បាល់ទាត់៖ ពាក់កណ្តាលសប្តាហ៍នេះ ការប្រកួតកីឡាបាល់ទាត់ជម្រើសជើងឯកជាតិកម្ពុជា មិត្តហ្វូនខាំបូឌានលីគ ដំណើរការដល់សប្តាហ៍ទី១៥ ខណៈពីរប្រកួតនៅខេត្តសៀមត្រូវលើកពេលប្រកួតដោយសារបច្ចុប្បន្នភាពកូវីដ-១៩ នៅទីនោះ។
សម្រាបថ្ងៃទី២២ ខែកញ្ញានេះ ណាហ្កាវើលដ៍ត្រូវបើកកីឡដ្ឋានកងយោធពលខេមរភូមិន្ទ (ស្តាតចាស់) ទទួលក្លិបព្រះខ័នរាជស្វាយរៀងម៉ោង៣និង៣០នាទីរសៀល។ ប្រាំប្រកួតចុងក្រោយនេះ ណាហ្កាវើលដ៍ធ្វើបានល្អដោយមិនចាញ់សូម្បីមួយប្រកួត ពោលស្មើ ២ប្រកួត និងឈ្នះ ៣ប្រកួត ហើយចុងក្រោយនេះកាលពីសប្តាហ៍កន្លងទៅឈ្នះអង្គរថាយហ្គឺរ ៤ទល់នឹង២។ ចំនែកព្រះខ័នរាជស្វាយរៀង ៥ប្រកួតចុងក្រោយឈ្នះ ៤ប្រកួត និងចាញ់ ១ប្រកួត។ ប្រកួតចុងក្រោយ ព្រះខ័នរាជស្វាយរៀងឈ្នះភ្នំពេញក្រោន ១ទល់នឹង០ ដោយកីឡាករចំនូលថ្មីប្អូនប្រុសបង្កើតរបស់ Privat, Emmanuel Junior។ ឆ្លងកាត់ ១៣ប្រកួតក្លិបទាំងពីរមាន ២៨ពិន្ទុដូចគ្នា តែព្រះខ័នរាជស្វាយរៀងឈរនៅកំពូលតារាង ចំនែកណាហ្កាវើលដ៍លេខ៤។ ជំនួប ៧ប្រកួតចុងក្រោយតាំងពីឆ្នាំ២០១៩ ក្លិបទាំងពីរស្មើគ្នា ២ដង ណាហ្កាវើលដ៍ឈ្នះ ២ដង និងព្រះខ័នរាជស្វាយរៀងឈ្នះ ៣ដង។
ថ្ងៃនេះដែរក្លិបអតីតជើងឯក ៦សម័យភ្នំពេញក្រោនទទួលគិរីវង់សុខសែនជ័យនៅកីឡដ្ឋាន RSN ម៉ោង៦និង០០នាទីល្ងាច។ មុនជួបគ្នា ភ្នំពេញក្រោនទើបតែចាញ់ព្រះខ័នរាជស្វាយរៀង ០ទល់នឹង១ ខណៈដែលក្លិបមកពីខេត្តតាកែវ គិរីវង់ចាញ់កងយោធពលខេមរភូមិន្ទ ១ទល់នឹង៣។ ភ្នំពេញក្រោនពេលនេះមាន ២៨ពិន្ទុដូចព្រះខ័នរាជ វិសាខា និងណាហ្កាវើលដ៍ដែរ តែឈរនៅចំណាត់ថ្នាក់លេខ៣ ឯគិរីវង់សែនជ័យឈរនៅចំណាត់លេខ៨ មាន ១៣ពិន្ទុ។ ៧ប្រកួតដែលក្លិបទាំងពីរជួបគ្នា ភ្នំពេញក្រោនឈ្នះ ៥ប្រកួត ស្មើមួយប្រកួត និងចាញ់មួយប្រកួត។ ប្រកួតទាំងពីរនេះប៊ីធីវីផ្សាយផ្ទាល់។ ថ្ងៃជាមួយគ្នានេះដែរនៅទឹកដី 7NG ក្លិបនគរបាលជាតិកម្ពុជាប្រកួតជាមួយអាស៊ីអឺរ៉ុបម៉ោង៣និង៣០នាទីរសៀល។ សប្តាហ៍ទី១៤ នគរបាលជាតិសម្រាក រីឯអាស៊ីអឺរ៉ុបប្រកួតជាមួយព្រៃវែង តែចាញ់ ១ទល់នឹង៤។ គិតត្រឹមបញ្ចប់ជើងទី១ នគរបាលជាតិមិនទាន់ឈ្នះការប្រកួតនៅឡើងបានត្រឹមស្មើ ៤ដងមាន ៤ពិន្ទុ។ អាស៊ីអឺរ៉ុប លេខ៩ មាន ១៣ពិន្ទុឃ្លាតពីតំបន់កាត់ចោល ៩ពិន្ទុ។ ៧ប្រកួតដែលក្រុមទាំងពីរជួបគ្នាតាំងពី ២០១៨ នគរបាលជាតិឈ្នះ ៣ប្រកួត ស្មើ ៣ប្រកួត និងចាញ់ ១ប្រកួត។ ដោយឡែកការប្រកួតថ្ងៃទី២៣ ខែកញ្ញា ក្លិបកងយោធពលខេមរភូមិន្ទទទួលបឹងកេតម៉ោង ៣និង៣០នាទីរសៀល ដោយមានផ្សាយផ្ទាល់ពីរទូរទស្សន៍ប៊ីធីវី៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
