ក្រុមហ៊ុន BMW បាននិយាយកាលពីថ្ងៃអង្គារ (១០ កញ្ញា) ថាខ្លួនកំពុងប្រមូលរថយន្តប្រហែល ១,៥លានគ្រឿងទូទាំងពិភពលោកមកវិញដោយសារបញ្ហាហ្វ្រាំង និងបានកាត់បន្ថយការរំពឹងទុកនៃចំណូលរបស់ខ្លួនសម្រាប់ឆ្នាំ២០២៤ ដែលធ្វើឱ្យភាគហ៊ុនរបស់ក្រុមហ៊ុនផលិតរថយន្តប្រណីតអាល្លឺម៉ង់មួយនេះរង្គោះរង្គើ។

ក្រុមបាននិយាយថា ការប្រមូលមកវិញនឹងជះ “ឥទ្ធិពលអវិជ្ជមាននៃការលក់ទូទាំងពិភពលោកនៅក្នុងឆមាសទីពីរនៃឆ្នាំ២០២៤នេះ” ដែលការប្រមូលនោះរួមបញ្ចូលរថយន្តម៉ាក រ៉ូលរ៉យ (Rolls-Royce) និងមីនី ឃូបភើ (Mini Cooper)។ ក្រុមហ៊ុននិយាយថាផលប៉ះពាល់ផ្នែកហិរញ្ញវត្ថុក្នុងរយៈពេលបីខែដល់ចុងខែកញ្ញា នឹងស្ថិតក្នុងតួលេខ «បីខ្ទង់» នៃប្រាក់លានអឺរ៉ូ។

នេះជាដំណឹងដ៏អាក្រក់បន្ថែមទៀតសម្រាប់ BMW ដែលរងការវាយប្រហារដោយការធ្លាក់ចុះនៃតម្រូវការនៅចិន ហើយសម្រាប់វិស័យរថយន្តអាល្លឺម៉ង់កាន់តែទូលំទូលាយ បន្ទាប់ពីក្រុមហ៊ុន វ៉ូកស្វាហ្គេន (Volkswagen) បាននិយាយកាលពីសប្តាហ៍មុនថា ខ្លួនកំពុងពិចារណាលើជំហានដែលមិនធ្លាប់មានពីមុនមកនៃការបិទរោងចក្រនៅអាល្លឺម៉ង់។ ប្រភពជិតស្និទ្ធនឹងបញ្ហានេះបានប្រាប់ទីភ្នាក់ងារសារព័ត៌មានបារាំង Presse ថា ប្រព័ន្ធហ្វ្រាំងដែលនៅពីក្រោយបញ្ហានេះ ត្រូវបានផ្គត់ផ្គង់ដោយក្រុមហ៊ុន ខនធីនែនថល (Continental)។

BMW បាននិយាយថា រថយន្តប្រហែល ១.២លានគ្រឿងត្រូវបានប្រគល់ជូនអតិថិជនរួចហើយ ហើយអាចត្រូវបានត្រួតពិនិត្យពីចម្ងាយសម្រាប់កំហុសបច្ចេកទេសតាមរយៈសូហ្វវែរពីចម្ងាយ (over-the-air software) ប៉ុន្តែរថយន្ត ៣២០.០០០គ្រឿងដែលនៅសល់មិនទាន់អាចប្រគល់ទៅវិញបានទេនៅពេលនេះ៕