បាល់ទាត់៖ សហព័ន្ធបាល់ទាត់អាស៊ីអាគ្នេយ៍ដែលមានឯកឧត្តម ខៀវ សាម៉េត ជាប្រធានបានធ្វើការចាប់ឆ្នោតជាផ្លូវការដោយជោគជ័យ សម្រាប់ការប្រកួតបាល់ទាត់ពានរង្វាន់តំបន់អាស៊ាន ២០២០ (AFF Suzuki Cup) ដែលពន្យាម្តងហើយម្តងទៀតដោយសារជំងឺកូវីដ-១៩។
ក្រុមបាល់ទាត់ជម្រើសជាតិកម្ពុជាស្ថិតក្នុងពូល B រួមជាមួយអ្នកការពារតំណែងជើងឯកវៀតណាម ម៉ាឡេស៊ី ឥណ្ឌូនេស៊ី និងឡាវ។ ចំនែកពូល A មានថៃ សហភាពមីយ៉ាន់ម៉ា ហ្វីលីពីន សិង្ហបុរី និងអ្នកឈ្នះរវាងព្រុយណេ និងទីម័រខាងកើត។ តាមការគ្រោងទុកការប្រកួតដំណើរការពីថ្ងៃទី០៥ ខែធ្នូ ឆ្នាំ២០២០ ដល់ថ្ងៃទី០១ ខែមករា ឆ្នាំ២០២២។ មិនខុសពីឆ្នាំ២០១៨ ក្រុមបាល់ទាត់ជម្រើសជាតិកម្ពុជា បើកយុទ្ធនាការជើងឯកអាស៊ាននេះដោយត្រូវជួបម៉ាឡេស៊ី ថ្ងៃទី៦ ខែធ្នូ មុនជួបឥណ្ឌូនេស៊ីថ្ងៃទី៩ ខែធ្នូ ជួបឡាវថ្ងៃទី១៥ ខែធ្នូ និងចុងក្រោយជួបវៀតណាមថ្ងៃទី១៩ ខែធ្នូ។ វគ្គពាក់កណ្តាលផ្តាច់ព្រ័ត្រលេងនៅថ្ងៃទី២២ និង២៣ ខែធ្នូសម្រាប់ជើងទី១ ខណៈជើងទី២ លេងនៅថ្ងៃទី២៥ និង២៦ ខែធ្នូ។ ចំនែកវគ្គផ្តាច់ព្រ័ត្រនឹងលេងនៅថ្ងៃទី២៩ ខែធ្នូ និងថ្ងៃទី០១ ខែមករា ឆ្នាំ២០២២។
មកដល់ពេលនេះប្រទេសម្ចាស់ផ្ទះរវាងបេក្ខភាព កម្ពុជា ថៃ សិង្ហបុរី ឥណ្ឌូនេស៊ី និងវៀតណាម មិនទាន់ប្រកាសនៅឡើយ តែប្រភពស្និទ្ធនឹងសហព័ន្ធបាល់ទាត់អាស៊ានឱ្យដឹងថា AFF នឹងសម្រេចប្រទេសម្ចាស់ផ្ទះក្នុងកិច្ចប្រជុំសប្តាហ៍ក្រោយ។ ឆ្នាំ២០១៨ គោព្រៃកម្ពុជាមិនបានឆ្លងផុតពូលទេបន្ទាប់ពីឆ្លងកាត់ ៤ប្រកួត ចាញ់ម៉ាឡេស៊ី ០ទល់នឹង១, ចាញ់សហភាពមីយ៉ាម៉ា ៤ទល់នឹង១, ឈ្នះឡាវ ៣ទល់នឹង១ និងចាញ់វៀតណាម ៣ទល់នឹង០៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
