នាយករដ្ឋមន្ត្រីអេស្ប៉ាញ លោក Pedro Sanchez នៅថ្ងៃពុធ (ទី១១ ខែកញ្ញា) នេះ បាននិយាយថា មិនចាំបាច់មានសង្រ្គាមពាណិជ្ជកម្ម រវាងសហភាពអឺរ៉ុប (EU) និងចិននោះទេ ហើយភាគីទាំង២ គួរតែស្វែងរកការសម្របសម្រួល ដើម្បីឲ្យមានការព្រមព្រៀងគ្នា ជុំវិញផែនការដំឡើងពន្ធគយ។

លោក Sanchez បានធ្វើការកត់សម្គាល់បែបនេះ អំឡុងពេលកំពុងថ្លែងនៅក្នុងព្រឹត្តិការណ៍មួយ នៅសួនឧស្សាហកម្ម Mondragon ក្នុងទីក្រុង Kunshan ជាទីក្រុងដែលនៅជិតក្រុង Shanghai។

លោកកំពុងលើកឡើងសំដៅទៅកាន់ចំណាត់ការរបស់គណៈកម្មការអឺរ៉ុប ក្នុងការស៊ើបអង្កេតប្រឆាំងនឹងការឧបត្ថម្ភធនលើរថយន្តអគ្គិសនី (EV) ផលិតនៅប្រទេសចិន ហើយ EU កំពុងថ្លែងថ្លែងពីការដំឡើងពន្ធយ៉ាងធ្ងន់ធ្ងរ។ EU បានកែសម្រួលពន្ធមួយចំនួន ឬកាត់បន្ថយកម្រិតពន្ធដែលបានស្នើឡើងលើកចុងក្រោយ ដែលគេរំពឹងថា សមាជិករបស់ប្លុកនេះ នឹងបោះឆ្នោតនៅខែតុលា។ នៅសប្តាហ៍នេះ ប្រទេសចិនបានបន្តកិច្ចខិតខំប្រឹងប្រែងចរចារ ដោយស្វែងរកការលុបចោលកាតព្វកិច្ចពន្ធដែលបានស្នើឡើង លើរថយន្ត EV របស់ចិន។

នៅពេលត្រូវបានសួរថា តើប្រទេសអេស្ប៉ាញ នឹងពិចារណាឡើងវិញនូវការបោះឆ្នោតរបស់ខ្លួន ជុំវិញការដំឡើងពន្ធរបស់ EU លើរថយន្ត EV ដែលផលិតនៅចិននោះ លោក Sanchez បានឆ្លើយតបថា៖ «ខ្ញុំត្រូវតែនិយាយដោយភាពស្មោះត្រង់ យើងត្រូវតែពិចារណាឡើងវិញនូវជំហររបស់យើងទាំងអស់គ្នា ដោយមិនត្រឹមតែរដ្ឋជាសមាជិកប៉ុណ្ណោះទេ ប៉ុន្តែថែមទាំងគណៈកម្មការផងដែរ»។

លោក Sanchez បានសង្កត់ធ្ងន់បន្ថែមថា៖ «យើងមិនត្រូវការសង្រ្គាមទៀតទេ ក្នុងករណីនេះ គឺសង្រ្គាមពាណិជ្ជកម្ម។ ខ្ញុំគិតថា យើងត្រូវពង្រឹងទំនាក់ទំនង រវាងសហភាពអឺរ៉ុប និងចិន ហើយពីប្រទេសអេស្ប៉ាញ យើងនឹងប្រែងប្រែងស្ថាបនា ហើយព្យាយាមស្វែងរកការសម្របសម្រួល រវាងចិន និងគណៈកម្មការអឺរ៉ុប»។ 

គួរបញ្ជាក់ថា លោក Sanchez បានស្ថិតនៅប្រទេសចិន សម្រាប់ទស្សនកិច្ចផ្លូវរដ្ឋរបស់លោក។ កាលពីថ្ងៃចន្ទ (ទី៩ ខែកញ្ញា) ក្នុងជំនួបជាមួយប្រធានាធិបតីចិន លោក Xi Jinping លោកក៏បានលើកឡើងផងដែរថា លោកសង្ឃឹមថា សហភាពអឺរ៉ុបអាចបញ្ចៀសសង្គ្រាមពាណិជ្ជកម្មជាមួយប្រទេសចិន៕