បើយោងតាមការរាយការណ៍ពីអឌ្ឍចន្ទក្រហមប៉ាឡេស្ទីន នៅថ្ងៃពុធ (ទី១១ ខែកញ្ញា) នេះ បានឲ្យដឹងថាមនុស្សយ៉ាងហោចណាស់ ៥នាក់ បានស្លាប់នៅក្នុងការវាយប្រហារតាមអាកាសរបស់អ៊ីស្រាអែលទៅលើទីក្រុង Tubas នៅតំបន់ West Bank។

ជាមួយគ្នានេះ អឌ្ឍចន្ទក្រហមបានបន្ថែមថា ក្រុមនាវិករបស់ខ្លួនអាចទាញយកសពមនុស្ស ៥នាក់ចេញពីកន្លែងទម្លាក់គ្រាប់បែក ហើយពួកគេត្រូវបានបញ្ជូនទៅកាន់មន្ទីរពេទ្យ។

ចំណែកកងទ័ពអ៊ីស្រាអែលបានឲ្យដឹងនៅក្នុងសេចក្តីថ្លែងការណ៍ថា៖ «ជាផ្នែកមួយនៃសកម្មភាពប្រឆាំងភេរវកម្ម យន្តហោះ IAF បានវាយប្រហារលើបក្សពួកភេរវករប្រដាប់អាវុធ នៅបន្តិចមុននេះ ក្នុងតំបន់នៃទីក្រុង Tubas»។

គួរបញ្ជាក់ថា អំពើហិង្សានៅតំបន់កាន់កាប់ West Bank ដែលមានសភាពខ្លាំងក្លារួចទៅហើយ មុនមានសង្រ្គាម នៅតំបន់ហ្កាហ្សានោះ បានកើនឡើងកាន់តែខ្លាំង នាពេលថ្មីៗនេះ ដោយមានការវាយឆ្មក់របស់យោធាអ៊ីស្រាអែល និងអ្នកតាំងលំនៅថ្មី ហើយនិងអំពើហិង្សាតាមដងផ្លូវរបស់ប៉ាឡេស្ទីន៕