នគរបាលអេស្ប៉ាញ បាននិយាយថា ពួកគេរឹបអូសបានថ្នាំគ្រវី(Ecstasy)ជាង ១លានគ្រាប់ ក្នុងប្រតិបត្តិការនៅលើកោះ Ibiza ស្ថិតក្នុងប្រជុំកោះ Balearic ក៏ដូចជាសារធាតុកូកាអ៊ីន កេតាមីន និងថ្នាំញៀនជាច្រើនផ្សេងទៀត ។

ឆ្មាំស៊ីវិល និយាយនៅក្នុងសេចក្តីថ្លែងការណ៍ថា វាគឺជាការរឹបអូសបានថ្នាំញៀនសំយោគធំបំផុត ពុំធ្លាប់ដែលមាន នៅក្នុងប្រទេសអេស្ប៉ាញ ។

ក្រុមនគរបាល និយាយថា ថ្នាំញៀនទាំងនេះ រួមមានថ្នាំគ្រវីចំនួន ១.០៧១.៣២៧គ្រាន់ កេតាមីនទម្ងន់ ២១២គ.ក កូកាអ៊ីន ទម្ងន់ ២១គ.ក Hashish ទម្ងន់ ១០គ.ក និងកញ្ឆា ទម្ងន់ ៦គ.ក ។

ពួកគេបន្តថា ថ្នាំញៀនទាំងនេះ អាចមានតម្លៃរហូតដល់ ២៥លានអឺរ៉ូ ហើយអំឡុងប្រតិបត្តិការរឹបអូស នគរបាលចាប់ខ្លួនបានមនុស្ស ៩នាក់ រួមទាំងជនជាតិអ៊ីតាលីម្នាក់ ដែលមានមូលដ្ឋាននៅលើកោះ Ibiza ៕