​បាល់ទាត់៖ ​ក្លិប​បាល់ទាត់​បារាំង Paris Saint Germain បានប្រកាស​នៅលើ​គេហទំព័រ​របស់ខ្លួន​ថា ​ខ្សែប្រយុទ្ធ​អា​ហ្ស​ង់​ទីន Lionel Messi នឹង​អវត្តមាន​ពី​ការប្រកួត​យប់​នេះ​ទល់នឹង Metz ដោយសារ​របួស​ជង្គង់​ខាងឆ្វេង​។

​​កីឡាករ​វ័យ ៣៤ឆ្នាំ​រូបនេះ​បានទទួល​ការពិនិត្យ និង​ស្កេ​ន MRI នៅ​ថ្ងៃ​អង្គារ​ម្សិលមិញ​ឃើញថា​មាន​របួស​នេះ​។ ​តាំងពី​ផ្ទេរ​មកកាន់ PSG, Lionel Messi នៅ​មិនទាន់​រកបាន​គ្រាប់​បាល់​ដំបូង​នៅឡើយ ខណៈដែល​ការប្រកួត​ចុង​សប្តាហ៍​កន្លងទៅ​ពេល PSG ឈ្នះ Lyon ២-១ នោះ គេ​ត្រូវបាន​ផ្លាស់ប្តូរ​ចេញ​នៅ​នាទី​ទី៧៦ និង​បាន​សំដែង​ការមិន​ពេញចិត្ត​ចំពោះ​អ្នកចាត់ការ Mauricio Pochettino ផងដែរ​។ ​​ជុំវិញ​បញ្ហា​នេះ​អតីត​អ្នកចាត់ការ Spurs រូបនេះ​បាន​ពន្យល់ថា ពេលខ្លះ​កីឡាករ​មិនមាន​អារម្មណ៍ល្អ​ឡើយ​នៅពេល​ផ្លាស់ចេញ នេះ​ជា​រឿង​ដែល​កើតមានឡើង​ច្រើន​ហើយ ហើយ​លោក​នៅតែ​ការពារ​ការសំរេចចិត្ត​នេះ​ទោះបី​ពេលខ្លះ​ត្រូវ ពេលខ្លះ​ក៏​ខុស បាល់ទាត់​គឺ​បែបនេះ​។

​​Lionel Messi បាន​ចូល​លេង​ទាំង​ជា​កីឡាករ​បម្រុង និង​ចាប់ផ្តើម ១១នាក់​រួចហើយ​នៅ PSG នេះ​តែ​នៅតែ​មិនអាច​រក​គ្រាប់​បាល់​បាន ពោលគឺ​គ្មាន​សំណាង​ដោយ​ឱកាស​ជាច្រើន​ឃើញ​មាន​ដែរ ​តែ​បាន​ត្រឹម​បុក​របារ​ទី ១លើក​ជា ២លើក​៕

​អត្ថបទ​៖​នាង សុភា​វុ​ធ