ក្រុមបុគ្គលិកពេទ្យនៅជួរមុខនៃការប្រយុទ្ធប្រឆាំងនឹងជំងឺអុតស្វា ឬmpox នៅភាគខាងកើតសាធារណរដ្ឋប្រជាធិបតេយ្យកុងហ្គោ បានប្រាប់ទូរទស្សន៍ BBC ថាពួកគេអស់សង្ឃឹមក្នុងការទទួលបានវ៉ាក់សាំង ដើម្បីឲ្យពួកគេអាចទប់ស្កាត់អត្រាចម្លងថ្មីបាន។

នៅមជ្ឈមណ្ឌលព្យាបាលមួយកន្លែងក្នុងខេត្ត South Kivu ដែលក្រុមបុគ្គលិកទូរទស្សន៍ BBC បានទៅពិនិត្យនៅចំណុចកណ្តាលការផ្ទុះឡើងនៃជំងឺនេះ និយាយថាអ្នកជំងឺកាន់តែច្រើនកំពុងមកដល់ជារៀងរាល់ថ្ងៃ ជាពិសេសទារក ហើយមានការខ្វះខាតឧបករណ៍ចាំបាច់។

ជំងឺអុតស្វា គឺជាជំងឺឆ្លង ហើយបានសម្លាប់មនុស្សយ៉ាងហោចណាស់ ៦៣៥ នាក់នៅសាធារណរដ្ឋកុងហ្គោក្នុងឆ្នាំនេះ។

ទោះបីជាវ៉ាក់សាំងចំនួន២០០.០០០ដូស ដែលត្រូវបានផ្ដល់ដោយគណៈកម្មការអឺរ៉ុបត្រូវបានដឹកជញ្ជូនទៅកាន់រដ្ឋធានី Kinshasa កាលពីសប្តាហ៍មុនក៏ដោយ ក៏វ៉ាក់សាំងទាំងនោះពុំទាន់ត្រូវបានដឹកជញ្ជូនចែកចាយទូទាំងប្រទេសនៅឡើយដែរ ហើយអាចមានរយៈពេលជាច្រើនសប្តាហ៍មុនពេលវ៉ាក់សាំងទាំងនោះទៅដល់ ខេត្ត South Kivu។

គិលានុបដ្ឋាកមួយរូបបម្រើការនៅគ្លីនីកដែលត្រូវបានប្រែទៅជាមជ្ឈមណ្ឌលឯកទេសដើម្បីដោះស្រាយការឆ្លងរាលដាលជំងឺនេះ បានប្រាប់ទូរទស្សន៍ BBC ថាយើងបានដឹងពីប្រព័ន្ធផ្សព្វផ្សាយថាសង្គមថាវ៉ាក់សាំងនេះមានរួចហើយ ។

លោកថានេះជាលើកទីមួយហើយដែលលោកបានព្យាបាលអ្នកជំងឺអុតស្វា ហើយជារៀងរាល់ថ្ងៃលោកភ័យខ្លាចថានឹងឆ្លងជំងឺនេះ ហើយចម្លងបន្តទៅកូនៗរបស់លោក៕