ប្រជាជននៅក្នុងខេត្តចំនួន៤៨ រួមទាំងទីក្រុងបាងកក ត្រូវបានផ្តល់ការព្រមានអំពីភ្លៀងធ្លាក់ខ្លាំង និងទឹកជំនន់ដ៏គំហុកដែលអាចកើតមានចាប់ពីថ្ងៃសុក្រទី១៣ រហូតដល់ថ្ងៃទី១៨ ខែកញ្ញា។

ការិយាល័យធនធានទឹកជាតិ បាននិយាយនៅលើទំព័របណ្តាញផ្សព្វផ្សាយសង្គមថារដូវភ្លៀងមូសុងនៅភាគខាងជើង ធ្វើដំណើររហូតដល់ខ្ពង់រាបប្រទេសថៃ នៅចន្លោះថ្ងៃទី១៣ និងថ្ងៃទី១៨ ខែកញ្ញា។

ទន្ទឹមនឹងនេះ ភ្លៀងមូសុងនិរតី ក្នុងកម្រិតខ្លាំងនឹងធ្លាក់បន្ថែមទៀត នៅតំបន់មួយចំនួន។

ការិយាល័យធនធានទឹកជាតិ បានព្រមានដល់អ្នកស្រុកនៃសហគមន៍ដែលងាយរងគ្រោះដោយទឹកជំនន់ ឱ្យត្រៀមទប់ទល់នឹងទឹកជំនន់ដ៏គំហុក ក្នុងអំឡុងពេលនេះ។

នាយកដ្ឋានបង្ការ និងកាត់បន្ថយគ្រោះមហន្តរាយ បានរាយការណ៍កាលពីថ្ងៃពុធថា ទឹកជំនន់ និងបំណាក់ដី ដែលបណ្តាលមកពីឥទ្ធិពលរបស់ព្យុះទីហ្វុង Yagi បានឆក់យកជីវិតមនុស្ស៩ នាក់នៅភាគខាងជើងប្រទេសថៃ។

អាជ្ញាធរបញ្ជាក់ថា មនុស្ស៩នាក់ស្លាប់ និងជាង២២.០០០គ្រួសារ បានរងផលប៉ះពាល់ដោយសារទឹកជំនន់ នៅប្រទេសថៃភាគខាងជើង។ ជើងហោះហើរមួយចំនួន ត្រូវបានលប់ចោលនៅអាកាសយានដ្ឋានអន្តរជាតិ ឈៀងរ៉ៃ ដោយសារតែអាកាសធាតុមិនអំណោយផលខ្លាំង។

នាយករដ្ឋមន្ត្រី លោកស្រី ផែ ថងថាន ស៊ីនណាវ៉ាត បានដឹកនាំកិច្ចប្រជុំមួយ ដើម្បីដោះស្រាយវិបត្តិទឹកជំនន់ នៅក្នុងខេត្តឈៀងរ៉ៃ និងខេត្តឈៀងម៉ៃ នៅថ្ងៃព្រហស្បតិ៍នេះ។