នាយករដ្ឋមន្ត្រីលីបង់ លោក ណាជីប មីកាទី (Najib Mikati) បានប្រកាសកាលពីថ្ងៃពុធថា ប្រជាជនប្រហែល ១៤០.000នាក់ ត្រូវបានជម្លៀសពីភាគខាងត្បូងលីបង់ ទៅកាន់ផ្នែកផ្សេងទៀតនៃប្រទេសនេះ ដោយសារតែការប៉ះទង្គិចគ្នាជាបន្តបន្ទាប់រវាងក្រុមក្រុមហេសបូឡា និងកងទ័ពអ៊ីស្រាអែល។

ដោយថ្លែងក្នុងកិច្ចប្រជុំគណៈរដ្ឋមន្ត្រី លោក មីកាទី បាននិយាយថា ការជម្លៀស កំពុងបន្ត ហើយអាជ្ញាធរគ្រប់គ្រងស្ថានភាពគ្រាអាសន្ន កំពុងធ្វើការដើម្បីផ្តល់ជំនួយ និងការសង្គ្រោះចាំបាច់។ នេះបើយោងតាមសេចក្តីថ្លែងការណ៍ចេញផ្សាយដោយទីស្តីការគណៈរដ្ឋមន្ត្រីលីបង់។

លោក មីកាទី បានថ្កោលទោស «ការឈ្លានពានរបស់អ៊ីស្រាអែល»ដែលលោកបាននិយាយថា បានកំណត់គោលដៅលើជនស៊ីវិល ក្រុមគ្រូពេទ្យ និងការការពារជនស៊ីវិល។

លោកបានជំរុញឲ្យសហគមន៍អន្តរជាតិ បង្កើនកិច្ចខិតខំប្រឹងប្រែង និងដាក់សម្ពាធលើអ៊ីស្រាអែលឲ្យ បញ្ឈប់សកម្មភាពរបស់ខ្លួនប្រឆាំងនឹងប្រទេសលីបង់ ហើយបានបង្ហាញពីផែនការសម្រាប់ប្រទេសលីបង់ក្នុងការដាក់ពាក្យបណ្តឹងថ្មីមួយ ទៅកាន់ក្រុមប្រឹក្សាសន្តិសុខអង្គការសហប្រជាជាតិ ជុំវិញការរំលោភបំពានរបស់អ៊ីស្រាអែល។