អូស្ត្រាលីបាននិយាយថា ខ្លួននឹងផាកពិន័យបណ្ដាញសង្គមរហូតដល់ ៥ភាគរយនៃប្រាក់ចំណូលសកលរបស់ពួកគេ សម្រាប់ការខកខានមិនបានទប់ស្កាត់ការរីករាលដាលនៃព័ត៌មានមិនពិតតាមអ៊ីនធឺណិត ដោយចូលរួមជាមួយកិច្ចប្រឹងប្រែងទូទាំងពិភពលោកដើម្បីគ្រប់គ្រងក្រុមហ៊ុនបច្ចេកវិទ្យាខ្នាតយក្សដែលគ្មានព្រំដែន ប៉ុន្តែជំហាននេះធ្វើឱ្យក្រុមគាំទ្រសេរីភាពបញ្ចេញមតិខឹងសម្បារយ៉ាងខ្លាំង។

រដ្ឋាភិបាលនិយាយថា ខ្លួននឹងឱ្យវេទិកាបច្ចេកវិទ្យាកំណត់ក្រមសីលធម៌គ្រប់គ្រងលើមធ្យោបាយដែលពួកគេបញ្ឈប់ការផ្សព្វផ្សាយព័ត៌មានមិនពិតដ៏គ្រោះថ្នាក់ ដោយនិយតករនឹងកំណត់ស្តង់ដារផ្ទាល់ខ្លួន ហើយប្រសិនបើបណ្ដាញសង្គមណាមួយមិនធ្វើដូច្នេះទេ នោះក្រុមហ៊ុននឹងត្រូវផាកពិន័យចំពោះការមិនគោរពតាម។

សំណើច្បាប់ ដែលនឹងត្រូវណែនាំក្នុងសភានៅថ្ងៃព្រហស្បតិ៍ (១២ កញ្ញា) នេះ ផ្តោតលើខ្លឹមសារមិនពិតដែលប៉ះពាល់ដល់សុចរិតភាពនៃការបោះឆ្នោត ឬសុខភាពសាធារណៈ ការអំពាវនាវឱ្យរិះគន់ក្រុមណាមួយ ឬធ្វើឱ្យមនុស្សរងរបួស ការបង្កហានិភ័យរំខានដល់ហេដ្ឋារចនាសម្ព័ន្ធសំខាន់ៗ ឬសេវាសង្គ្រោះបន្ទាន់ជាដើម។

សំណើច្បាប់នេះគឺជាផ្នែកមួយនៃការបង្រ្កាបបទប្បញ្ញត្តិយ៉ាងទូលំទូលាយដោយប្រទេសអូស្ត្រាលី ដែលថ្នាក់មេដឹកនាំបានត្អូញត្អែរថាវេទិកាបច្ចេកវិទ្យាមានមូលដ្ឋាននៅបរទេស កំពុងគ្របដណ្ដប់លើអធិបតេយ្យភាពរបស់ប្រទេស។

ក្រុមហ៊ុនមេរបស់បណ្ដាញសង្គម Facebook គឺក្រុមហ៊ុន Meta បាននិយាយថា ខ្លួនអាចបិទមាតិកាព័ត៌មានអាជីព ប្រសិនបើត្រូវបង្ខំឱ្យបង់ថ្លៃណាមួយ ខណៈបណ្ដាញសង្គម X ដែលពីមុនឈ្មោះថា Twitter បានលុបចោលការសម្របសម្រួលមាតិកាភាគច្រើន ចាប់តាំងពីត្រូវបានទិញដោយលោកមហាសេដ្ឋី Elon Musk ក្នុងឆ្នាំ២០២២មក៕