ក្រសួងការបរទេសកូរ៉េខាងត្បូង បាននិយាយកាលពីថ្ងៃព្រហស្បតិ៍ថា ប្រទេសកូរ៉េខាងត្បូង នឹងផ្តល់ជំនួយមនុស្សធម៌ចំនួន ២លានដុល្លារ ដល់ប្រទេសវៀតណាម ដើម្បីជួយទប់ទល់នឹងផលវិបាកនៃព្យុះទីហ្វុងដ៏ខ្លាំង ដែលបានសម្លាប់មនុស្សជាង ១៥០នាក់។  

ក្រសួងបាននិយាយនៅក្នុងសេចក្តីប្រកាសមួយថា រដ្ឋាភិបាលសង្ឃឹមថា ការផ្តល់ជំនួយនេះ នឹងជួយដល់កិច្ចខិតខំប្រឹងប្រែងស្តារឡើងវិញ និងជួយអ្នកស្រុកដែលរងផលប៉ះពាល់ អាចវិលត្រឡប់មករស់នៅប្រចាំថ្ងៃបានយ៉ាងឆាប់រហ័ស។

ព្យុះទីហ្វុង Yagi ដែលជាព្យុះទីហ្វុងដ៏មានឥទ្ធិពលបំផុតនៅអាស៊ី ក្នុងឆ្នាំនេះ បានបោកបក់កាត់ភាគខាងជើងនៃប្រទេសវៀតណាម ដោយនាំមកនូវភ្លៀងធ្លាក់ខ្លាំង និងទឹកជំនន់លិចផ្លូវ និងភូមិនានា អស់រយៈពេលជាច្រើនថ្ងៃ។ រហូតមកទល់ពេលនេះ ព្យុះទីហ្វុងនេះ បានសម្លាប់មនុស្ស ១៥២នាក់ និង ១៤០នាក់ផ្សេងទៀត បាត់ខ្លួន។