ការបដិសេធរបស់អតីតប្រធានាធិបតីអាមេរិក Donald Trump ក្នុងការនិយាយថា លោកសង្ឃឹមថា អ៊ុយក្រែននឹងឈ្នះសង្រ្គាមរបស់ខ្លួន ប្រឆាំងនឹងរុស្ស៊ី បានបង្ហាញពីការយកចិត្តទុកដាក់លើអ្វីដែលសន្យាថា នឹងផ្លាស់ប្តូរគោលនយោបាយរបស់សហរដ្ឋអាមេរិកភ្លាមៗ ចំពោះជម្លោះនេះ និងទំនាក់ទំនងអាមេរិកជាមួយទីក្រុងម៉ូស្គូ ប្រសិនបើលោក Trump ត្រឡប់ទៅអង្គុយកៅអីសេតវិមានវិញ។

លោក Trump ត្រូវបានគេសួរដោយផ្ទាល់ចំនួន ២ដង នៅឯការជជែកដេញដោល កាលយប់ថ្ងៃទី១០ ខែកញ្ញាថា តើលោកសង្ឃឹមថា អ៊ុយក្រែនឈ្នះដែរ ឬយ៉ាងណា ហើយទាំង ២ដងនោះ លោកបាននិយាយដដែលៗថា គោលដៅសំខាន់របស់លោក គឺការបញ្ចប់សង្រ្គាមយ៉ាងឆាប់រហ័ស។

លោក Trump បាននិយាយថា៖ «ខ្ញុំគិតថា វាជាផលប្រយោជន៍ល្អបំផុតរបស់សហរដ្ឋអាមេរិក ក្នុងការធ្វើឲ្យសង្រ្គាមនេះបញ្ចប់ ហើយគ្រាន់តែធ្វើឲ្យសម្រេចបាន ពោលគឺចរចាឲ្យមានកិច្ចព្រមព្រៀងមួយ ពីព្រោះយើងត្រូវការពារជីវិតមនុស្សទាំងអស់កុំឲ្យរងការបំផ្លិចបំផ្លាញ»។

ជាមួយគ្នានេះ អតីតប្រធានាធិបតី បានបន្តលើកឡើងថា លោកនឹងបង្កើនទំនាក់ទំនងមិត្តភាពរបស់លោកជាមួយប្រធានាធិបតីរុស្ស៊ី Vladimir Putin ដោយគូសបញ្ជាក់យ៉ាងច្បាស់ថា លោកមានបំណងផ្លាស់ប្តូរទំនាក់ទំនងប្រឈមមុខដាក់គ្នារបស់ប្រធានាធិបតីលោក Joe Biden ជាមួយរុស្ស៊ី។

លោក John Bolton ដែលបានបម្រើការជាទីប្រឹក្សាសន្តិសុខជាតិរបស់លោក Trump បាននិយាយថា ចម្លើយរបស់លោក Trump «គួរតែប្រាប់មនុស្សទាំងអស់គ្នាដែលពួកគេត្រូវដឹង នោះគឺថា ប្រសិនបើលោក Trump ជាប់ឆ្នោត និងមានការពាក់ព័ន្ធ អ៊ុយក្រែននឹងក្លាយជាអ្នកចាញ់ ហើយរុស្ស៊ីនឹងក្លាយជាអ្នកឈ្នះ»៕