ក្រសួងយុត្តិធម៌អាមេរិក បានឲ្យដឹងថា អតីតភ្នាក់ងារស៊ើបការណ៍កណ្តាល (CIA) ដែលបានផ្ដល់ចម្លើយពីភាពមានទោស កាលពីខែឧសភា ជុំវិញបទចោទធ្វើចារកម្មឲ្យប្រទេសចិន ត្រូវបានកាត់ទោសឲ្យជាប់ពន្ធនាគាររយៈពេល ១០ឆ្នាំ កាលពីថ្ងៃពុធ (ទី១១ ខែកញ្ញា)។

លោក Alexander Yuk Ching Ma វ័យ ៧១ឆ្នាំ មានដើមកំណើតហុងកុង ដែលបានចូលសញ្ញាតិអាមេរិកហើយនោះ ត្រូវបានចាប់ខ្លួន នៅក្នុងខែសីហា ឆ្នាំ២០២០។

ក្រសួងយុត្តិធម៌ បានឲ្យដឹងនៅក្នុងសេចក្តីថ្លែងការណ៍ថា លោក Ma ដែលបានធ្វើការឲ្យ CIA ពីឆ្នាំ១៩៨២ ដល់ឆ្នាំ១៩៨៩ បានព្រមសារភាពថា បានផ្តល់ព័ត៌មានសម្ងាត់ពាក់ព័ន្ធនឹងវិស័យការពារជាតិដល់មន្រ្តីចារកម្មនៃការិយាល័យសន្តិសុខរដ្ឋសៀងហៃ (SSSB) របស់ប្រទេសចិន។

យោងតាមឯកសាររបស់តុលាការ សាច់ញាតិម្នាក់របស់លោក Ma ដែលមិនត្រូវបានគេបង្ហាញអត្តសញ្ញាណ និងស្លាប់ក្រោយមក ក៏បានធ្វើការឲ្យ CIA ពីឆ្នាំ១៩៦៧ រហូតដល់ឆ្នាំ១៩៨៣ និងជាអ្នករួមគំនិតផងដែរ។

ក្រសួងយុត្តិធម៌ បាននិយាយថា បុគ្គលទាំង២ បានប្រមូលព័ត៌មានសន្តិសុខសម្ងាត់សំខាន់ៗជាច្រើន។ ក្រសួងបានបន្ថែមថា លោក Ma និងអ្នករួមគំនិត បានជួបជាមួយភ្នាក់ងារ SSSB នៅទីក្រុងហុងកុង ក្នុងខែមីនា ឆ្នាំ២០០១ ហើយបានផ្តល់ឲ្យពួកគេនូវព័ត៌មានសម្ងាត់ ជាថ្នូរនឹងទឹកប្រាក់ចំនួន ៥០.000ដុល្លារអាមេរិក៕