ការិយាល័យតំបន់ជិតបូព៌ា និងអាហ្វ្រិកខាងជើងនៃអង្គការកសិកម្ម និងស្បៀងអាហារ(FAO)របស់អង្គការសហប្រជាជាតិ(UN) កាលពីថ្ងៃពុធ បានចុះយុទ្ធនាការចែកចាយគ្រាប់ពូជដល់ប្រជាពលរដ្ឋ នៅភូមិ Tobin និងភូមិ Shatta ស្ថិតក្នុងរដ្ឋ Red Sea ប្រទេសស៊ូដង់ ។

 បណ្តើមគំនិតនេះ មានគោលដៅជួយអ្នកភូមិ ប្រយុទ្ធប្រឆាំងនឹងអសន្តិសុខស្បៀងដែលកាន់តែធ្ងន់ធ្ងរទៅដោយសារជម្លោះកំពុងកើតឡើង និងផលប៉ះពាល់ដោយសារបម្រែបម្រួលអាកាសធាតុ ។

 គម្រោងនេះដែរ នឹងចាប់ផ្តើមពីខែកញ្ញានេះតទៅ សម្រាប់រយៈពេល ១៨ខែ ដោយមានការគាំទ្រពី FAO និងរដ្ឋាភិបាលចិន ហើយនិងមានតម្លៃ ២លានដុល្លារ ។

 វាមានគោលដៅជួយដល់ប្រជាកសិករ ប្រជានេសាទ និងអ្នកគង្វាលគោ-ក្របី នៅតាមតំបន់ផ្សេងៗគ្នាជាច្រើន ក្នុងរដ្ឋ Red Sea ប្រទេសស៊ូដង់ ស្របពេលដែលប្រទេសមួយនេះ រងការលំបាកខ្លាំងដោយសារផលប៉ះពាល់ពីសង្រ្គាមកំពុងបន្ត រវាងកងទ័ពស៊ូដង់ និងកងកម្លាំងគាំទ្ររហ័ស ។

 ដោយឡែក ទឹកជំនន់ បានវាយប្រហារប្រទេសមួយនេះ កាលពីខែសីហា ។ UN ប៉ាន់ប្រមាណថា មនុស្សជាង ៣០ម៉ឺននាក់ បានរងផលប៉ះពាល់ដោយសារទឹកជំនន់ ហើយវាបង្កឲ្យកើតមានជំងឺអាសន្នរោគផងដែរ ។

 សូមបញ្ជាក់ថា សង្រ្គាមរយៈពេលជាង ១៦ខែនៅក្នុងប្រទេសស៊ូដង់ បង្កឲ្យមានការខូចខាតទ្រង់ទ្រាយធំលើហេដ្ឋារចនាសម្ព័ន្ធ បង្ខំឲ្យមនុស្សជាង ១០លាននាក់ ចាកចេញពីផ្ទះសម្បែងរបស់ពួកគេ និងធ្វើឲ្យពលរដ្ឋពាក់កណ្តាល ប្រឈមនឹងវិបត្តិអត់ឃ្លាន ។

 កាលពីខែមុន ក្រុមអ្នកជំនាញ បាននិយាយថា គ្រោះទុរ្ភិក្ស កំពុងកើតឡើងនៅតំបន់មួយនៅទីក្រុង Darfur ហើយមាននូវហានិភ័យនៃគ្រោះទុរ្ភិក្សនៅតាមតំបន់ចំនួន ១៣ផ្សេងទៀត ៕