ការិយាល័យរបស់លោក បាននិយាយថា រដ្ឋមន្ត្រីក្រសួងការពារជាតិ លោក Kim Yong-hyun កាលពីថ្ងៃព្រហស្បតិ៍ បានជួបពិភាក្សាដាច់ដោយឡែកជាមួយមន្ត្រីការពារជាតិជាន់ខ្ពស់មកពីអារ៉ាប៊ីសាអ៊ូឌីត និងសមភាគីរបស់លោក មកពីប្រទេសរ៉្វាន់ដា និងកេនយ៉ា ដើម្បីពិភាក្សាអំពីវិធីពង្រីកកិច្ចសហប្រតិបត្តិការ។

យោងតាមក្រសួងបានឲ្យដឹងថា លោក Kim Yong-hyun បានជួបជាមួយលោក Khaled bin Hussein Al-Biyari ជំនួយការរដ្ឋមន្ត្រីក្រសួងការពារជាតិអារ៉ាប៊ីសាអ៊ូឌីតទទួលបន្ទុកកិច្ចការប្រតិបត្តិ នៅក្រៅវេទិកានៃសន្និសីទសន្តិសុខនៃកិច្ចសន្ទនាការពារជាតិ នៅទីក្រុងសេអ៊ូល។ 

ក្រសួងបាននិយាយថា ក្នុងអំឡុងកិច្ចពិភាក្សា លោក Kim Yong-hyun បានអំពាវនាវឲ្យពង្រឹងកិច្ចសហប្រតិបត្តិការការពារជាតិទ្វេភាគី ហើយការិយាល័យរបស់ពួកគេ បានយល់ព្រមពង្រីកកិច្ចសហប្រតិបត្តិការក្នុងគម្រោងឧស្សាហកម្មអាវុធលើដី ដែនសមុទ្រ និងអាកាសចរណ៍។

លោក ក៏បានជួបជាមួយរដ្ឋមន្ត្រីការពារជាតិរ៉្វាន់ដា លោក Juvenal Marizamunda ដើម្បីពិភាក្សាអំពីមធ្យោបាយ ដើម្បីធ្វើសហប្រតិបត្តិការក្នុងវិស័យការពារជាតិ និងឧស្សាហកម្មអាវុធ។

លោក Kim Yong-hyun ក៏បានជួបពិភាក្សាជាមួយសមភាគីកេនយ៉ាគឺ លោក Roselinda Soipan Tuya ដែលជាជំនួបថ្នាក់រដ្ឋមន្ត្រីការពារជាតិលើកដំបូងរវាងប្រទេសទាំងពីរ ចាប់តាំងពីការបង្កើតទំនាក់ទំនងការទូត ក្នុងឆ្នាំ ១៩៦៤។