លោក Hoang Van Ty គឺជាកសិករវៀតណាម បាននៅចាំផ្ទះរបស់លោក ក្រោយគ្រួសារជម្លៀសចេញពីឃុំរងការជន់លិច Xuan Phuong ស្ថិតនៅក្នុងខេត្តភាគខាងជើង Thai Nguyen ប្រទេសវៀតណាម ដែលរងការវាយប្រហារដោយព្យុះទីហ្វុង Yagi ។

កសិករវ័យ ៥៧ឆ្នាំរូបនេះ និយាយប្រាប់ទីភ្នាក់ងារព័ត៌មានរ៉យទ័រថា លោកបាត់បង់អ្វីៗគ្រប់បែបយ៉ាងទាំងអស់ ។ ដំណាំរបស់លោក រងការខូចខាតគ្មានសេសសល់ ។ ស្រូវរបស់លោក ស្ទើតែជិតដល់ពេលច្រូតកាត់ទៅហើយ ប៉ុន្តែឥឡូវ វាត្រូវបានបំផ្លាញអស់ ។

លោកថា ទឹកជំនន់លើកនេះ ធ្ងន់ធ្ងរជាងទឹកជំនន់លើកមុនៗទាំងអស់ វាពិតជាគ្រោះថ្នាក់ខ្លាំងណាស់ ។ លោកពុំធ្លាប់ដែលគិតទាល់តែសោះថា ផ្ទះរបស់លោកត្រូវលិចក្នុងទឹកបែបនេះ ។ 

ដោយឡែក ក្រុមអ្នកស្រុកនៅក្នុងរដ្ឋធានីហាណូយរបស់ប្រទេសវៀតណាមបានធ្វើដំណើរឆ្លងកាត់ទឹកជម្រៅត្រឹមចង្កេះ ខណៈកម្ពស់ទឹកទន្លេហក់ឡើងដល់កម្រិតខ្ពស់ក្នុងរយៈពេល២០ឆ្នាំ ហើយចំនួនអ្នកស្លាប់ដោយសារព្យុះទីហ្វុងដ៏ខ្លាំងក្លាបំផុតនៅតំបន់នេះក្នុងប៉ុន្មានទសវត្សរ៍នេះ បានកើនឡើងដល់ជាង២០០នាក់ ខណៈប្រទេសជិតខាង ដូចជាប្រទេសថៃ កំពុងជួបប្រទះគ្រោះទឹកជំនន់ និងបំណាក់ដី ព្រមទាំងមានមនុស្សមួយចំនួនបាត់បង់ជីវិតផងដែរ ។ 

 គួរឲ្យដឹងថា ព្យុះទីហ្វុង Yagi បានវាយប្រហារប្រទេសវៀតណាមកាលពីចុងសប្តាហ៍មុន ដោយបានបក់បោកក្នុងល្បឿនខ្យល់បក់ ១៤៩គ.មក្នុងមួយម៉ោង ៕