ក្រុមហ៊ុន Boeing ប្រឈមជាមួយនឹងកូដកម្មដែលអាចកើតមាន នៅព្រឹកថ្ងៃសុក្រ (ទី១៣ ខែកញ្ញា) ប្រសិនបើកម្មកររោងចក្រភាគច្រើនរបស់ក្រុមហ៊ុនផលិតយន្តហោះអាមេរិកមួយនេះ នៅតំបន់ប៉ាស៊ីហ្វិកភាគពាយ័ព្យ បោះឆ្នោត នៅថ្ងៃព្រហស្បតិ៍ (ទី១២ ខែកញ្ញា) ដើម្បីគាំទ្រដល់ការបញ្ឈប់ការងារ និងបដិសេធកិច្ចព្រមព្រៀងបណ្តោះអាសន្នដែលបានធ្វើឲ្យពួកគេជាច្រើនខឹងសម្បា។

កម្មករប្រមាណជា ៣០.០០០នាក់ដែលផលិតយន្តហោះប្រភេទ 737 MAX, 767 និង 777 របស់ក្រុមហ៊ុន Boeing នៅទីក្រុង Portland រដ្ឋ Oregon និងតំបន់ Seattle នឹងបោះឆ្នោតលើកិច្ចសន្យាពេញលេញជាលើកដំបូងរបស់ពួកគេ ក្នុងរយៈពេល ១៦ឆ្នាំ។ អ្នកចរចាសហជីពដ៏សំខាន់មួយរូប បានទទួលស្គាល់ថា កម្មករជាច្រើនមានការខឹងសម្បា ដោយសារតែពួកគេចង់បានការដំឡើងប្រាក់ឈ្នួលកាន់តែខ្ពស់ និងលក្ខខណ្ឌការងារល្អប្រសើរផ្សេងៗទៀត។

តែទោះជាយ៉ាងណាក្ដី ដំណើរផ្លូវឆ្ពោះទៅរកការធ្វើកូដកម្ម គឺស្ថិតក្នុងភាពស្មុគស្មាញ និងខ្វះភាពច្បាស់លាស់។ ហើយបើយោងតាមសហជីព បានឲ្យដឹងថា លុះត្រាតែសំឡេងភាគច្រើន ២ភាគ៣ គាំទ្រឲ្យធ្វើកូដកម្មនោះ កិច្ចព្រមព្រៀងត្រូវបានអនុម័ត មិនថា ការបោះឆ្នោតលើកទី២ ផ្តោតលើការអនុម័តគាំទ្រកិច្ចសន្យា ឬអត់។

គួរបញ្ជាក់ថា កម្មករម្នាក់បានប្រាប់សារព័ត៌មាន Reuters ថា ការមិនសប្បាយចិត្តរបស់កម្មករ ចំពោះកិច្ចព្រមព្រៀងបណ្តោះអាសន្ន ដែលសម្រេចបាន កាលពីថ្ងៃអាទិត្យចុងសប្ដាហ៍កន្លងមក ត្រូវបានបង្ហាញនៅក្នុងរោងចក្រមួយចំនួននៃតំបន់ Seattle របស់ក្រុមហ៊ុន Boeing ដោយនិយោជិតកំពុងដើរដង្ហែរតវ៉ា ដើម្បីបង្ហាញការជំទាស់ នៅសប្តាហ៍នេះ៕