ក្រោយជម្លៀសខ្លួនទៅកាន់ប្រទេសកាតា ចេញពីភាពវឹកវរនៅតំបន់ហ្កាហ្សា ក្មេងប្រុសប៉ាឡេស្ទីន Mahmoud Youssef Ajjour វ័យ ៩ឆ្នាំ មានក្តីស្រមៃធំមួយចង់ក្លាយជាអ្នកបើកបរយន្តហោះនៅថ្ងៃណាមួយ បើទោះបីជារូបគេបាត់បង់ដៃទាំង ២របស់ខ្លួនក៏ដោយ នៅក្នុងការវាយប្រហារដោយរ៉ុក្កែតរបស់អ៊ីស្រាអែល ។

នៅក្នុងផ្ទះល្វែងតូចមួយ ស្ថិតក្នុងទីក្រុង Dohaរដ្ឋធានីរបស់ប្រទេសអ្នកមាននៅឈូងសមុទ្រអារ៉ាប់មួយនេះ ម្តាយរបស់ក្មេងប្រុស Ajjour ជួយស្លៀកពាក់ឯកសណ្ឋានសិស្សសាលាដល់រូបគេ ដើម្បីឲ្យកូនបានទៅរៀន ។ វាត្រូវការចំណាយពេលខ្លះ ដើម្បីផ្តល់ដៃសិប្បនិម្មិតដល់ក្មេងប្រុស ។

ក្មេងប្រុស Ajjour និយាយថា រ៉ុក្កែតបានធ្លាក់ ពេលដែលរូបគេ ដើរចេញពីផ្ទះនៅតំបន់ហ្កាហ្សា កាលពីខែធ្នូរ ជាមួយឪពុកម្តាយរបស់រូបគេ ។

ក្មេងប្រុស Ajjour និយាយថា ខ្ញុំដេកដួលលើដី ខ្ញុំមិនដឹងថាខ្ញុំត្រូវអ្វីនោះទេ ខ្ញុំអត់ដឹងថា ខ្ញុំបាត់បង់ដៃទាំងទ្វេបែបនេះទេ ។

ម្តាយរបស់ក្មេងប្រុស Ajjour និយាយថា កូនប្រុសរបស់គាត់ បានវះកាត់នៅតំបន់ហ្កាហ្សា ដោយ ចាក់ថ្នាំស្ពឹកមានកំណត់ ពេលភ្ញាក់ដឹងខ្លួនទាំងការឈឺចាប់ខ្លាំង ដៃកូនរបស់គាត់ ត្រូវបានបាត់បង់ ។

ក្មេងប្រុស Ajjour ស្ថិតក្នុងចំណោមមនុស្សមានសំណាង ដែលអាចរត់គេចចេញពីដែនដីរងភាពខ្ទេចខ្ទាំមួយនេះ ជាទីដែលមន្ទីរពេទ្យជាច្រើន ត្រូវបានបំផ្លិចបំផ្លាញ ហើយគ្រូពេទ្យ និយាយថា ពួកគេតែងតែធ្វើការវះកាត់ដោយគ្មានថ្នាំស្ពឺក និងថ្នាំបំបាត់ការឈឺចាប់នោះទេ ។

ប្រទេសកាតា បានទទួលយកពលរដ្ឋហ្កាហ្សារងរបួសមួយចំនួន ដើម្បីផ្តល់ការព្យាបាល ស្របពេលដែលពួកគេព្យាយាមសម្របសម្រួលជាមួយសហរដ្ឋអាមេរិក និងប្រទេសអេហ្ស៊ីប ឲ្យមានបទឈប់បាញ់រវាងអ៊ីស្រាអែល និងក្រុមហាម៉ាស់ នៅតំបន់ហ្កាហ្សា ៕