វីដេអូដែលបានបង្ហោះនៅលើបណ្តាញព័ត៌មានសង្គមនាថ្ងៃព្រហស្បតិ៍នេះ ឃើញស្ពានមួយកន្លែងរងការខូចខាតយ៉ាងដំណំ នៅក្នុងទីក្រុង Pokrovsk ប្រទេសអ៊ុយក្រែន ខណៈដែលក្រុមមន្រ្តីក្នុងស្រុក និយាយថា វារងការខូចខាតដោយសារការវាយប្រហារកាលពីយប់កន្លងទៅរបស់រុស្ស៊ី ។

 ទីតាំងរងការវាយប្រហារនេះ ត្រូវបានបញ្ជាក់ផ្ទៀងផ្ទាត់ដោយពណ៌លើស្ពាន បង្គោលភ្លើង ទីតាំងផ្លូវរថភ្លើង និងលក្ខណៈរបស់អគារនៅជិតនោះ ដែលត្រូវបានផ្គូផ្គងជាមួយរូបភាពផ្កាយរណប ។

 រូបភាពវីដេអូឃ្លីប និងរូបថតសន្លឹកដាច់ដោយឡែកមួយទៀត ឃើញស្ពានរងការខូចខាត មើលពីជ្រុងផ្សេង ។ កាលបរិច្ឆេតវាយប្រហារ ត្រូវបានបញ្ជាក់ផ្ទៀងផ្ទាត់ផងដែរនៅក្នុងសេចក្តីថ្លែងការណ៍របស់រដ្ឋបាលយោធាទីក្រុង Pokrovsk ដែលបាននិយាយថា ស្ពានអាកាសមួយកន្លែង ត្រូវបានបំផ្លាញដោយសារការផ្លោងគ្រាប់កាំភ្លើងរបស់រុស្ស៊ី កាលពីយប់រំលងអាធ្រាត្រថ្ងៃពុធ ឈានចូលដល់ព្រឹកថ្ងៃព្រហស្បតិ៍ ។

 នាយអគ្គសេនាកងទ័ពអ៊ុយក្រែន បាននិយាយកាលពីថ្ងៃអង្គារថា កងកម្លាំងទីក្រុងគីវ បានរុញច្រានការវាយប្រហាររបស់រុស្ស៊ី នៅជិតទីក្រុង Krasnohorivka និងទីក្រុង Hryhorivka ស្ថិតនៅភាគខាងកើតទីក្រុងសំខាន់ Pokrovsk ៕