អង្គការសហប្រជាជាតិ (UN) នៅថ្ងៃព្រហស្បតិ៍ (ទី១២ ខែកញ្ញា) នេះ បានឲ្យដឹងថា ជាលើកដំបូងហើយ ដែលប្រជាជនជាងពាក់កណ្តាលរបស់ពិភពលោក ទទួលបានអត្ថប្រយោជន៍សង្គមមួយចំនួន ប៉ុន្តែបានបន្ថែមថា នៅត្រូវការច្រើនបន្ថែមទៀត ក្នុងនោះរួមទាំងការបន្ថយនូវផលប៉ះពាល់ពីបម្រែបម្រួលអាកាសធាតុផងដែរ។

នៅក្នុងរបាយការណ៍ថ្មីៗនេះ អង្គការពលកម្មអន្តរជាតិ (ILO) បាននិយាយថា ៥២,៤ភាគរយនៃចំនួនប្រជាជនពិភពលោកនាពេលបច្ចុប្បន្ន ទទួលបានវត្ថុធាតុមួយចំនួននៃអ្វីដែលហៅថា ជាការការពារសង្គម។ ស្ថាប័ននេះបានលើកឡើងថា នោះគឺជាការកើនឡើងនូវចំនួនជិត ១០ភាគរយ ចាប់តាំងពីឆ្នាំ២០១៥ មក ហើយជាលើកដំបូងដែលជាងពាក់កណ្តាលនៃចំនួនប្រជាជនពិភពលោក ទទួលបានយ៉ាងហោចណាស់មួយចំនួន។

អមដោយការគូសបញ្ជាក់ថា កុមារជាង ៣ភាគ៤ ទូទាំងពិភពលោក នៅតែមិនទាន់ទទួលបានអត្ថប្រយោជន៍នេះ អង្គការ ILO បានប្រាប់ថា៖ «ទោះបីជាកម្រិតនេះ គឺជាការវិវត្តគួរជាទីពេញចិត្តក៏ដោយ ក៏ការពិតដែលមិនអាចបន្លំបាន គឺថា មនុស្ស ៣,៨ពាន់លាននាក់ នៅតែមិនត្រូវបានការពារទាំងស្រុងនោះដែរ»។

សម្រាប់អង្គការ ILO កិច្ចគាំពារសង្គម រួមមានការទទួលបានការថែទាំសុខភាព និងវិធានការសន្តិសុខប្រាក់ចំណូលដែលទាក់ទងជាពិសេសទៅនឹងអាយុវ័យចាស់ ភាពអត់ការងារធ្វើ ជំងឺ ការមានពិការភាព របួសពេលបំពេញការងារ មាតុភាព ឬការបាត់បង់អ្នកផ្គត់ផ្គង់ដ៏សំខាន់ក្នុងគ្រួសារ ក៏ដូចជាការគាំទ្របន្ថែមសម្រាប់គ្រួសារដែលមានកូន។ អង្គការ ILO បានព្រមានថា «ល្បឿននៃការធ្វើឲ្យគម្លាតការពារនោះកាន់តែតូច គឺមានសភាពយឺតពេកណាស់»៕