អាមេរិក៖ លោក Joe Biden ប្រធានាធិបតីអាមេរិកបានថ្លែងទៅកាន់ មហាសន្និបាតអង្គការសហប្រជាជាតិកាលពីថ្ងៃអង្គារដោយនិយាយថា សហរដ្ឋអាមេរិកមិនបានសម្លឹងរកការធ្វើសង្គ្រាមត្រជាក់ថ្មី ឬបង្កការបែកបាក់ក្នុងពិភពលោកអ្វីទេ ហើយបាននិយាយថា ក្រុងវ៉ាស៊ីនតោនត្រៀមខ្លួនធ្វើការជាមួយប្រទេសនានា ទោះបីយើងមានការខ្វែងគំនិតគ្នាខ្លាំងនៅក្នុងវិស័យផ្សេងទៀតក៏ដោយ។
ដោយមិននិយាយពីប្រទេសចិនចំឈ្មោះ លោក Biden បានទទួលស្គាល់ការព្រួយបារម្ភកាន់តែខ្លាំងឡើង អំពីភាពតានតឹងកើនឡើងរវាងប្រទេសទាំងពីរ។ លោកបាននិយាយថា សហរដ្ឋអាមេរិកនឹងបន្តរារាំងអ៊ីរ៉ង់មិនឲ្យផលិតអាវុធនុយក្លេអ៊ែរ ហើយនឹងស្វែងរកការវិលត្រឡប់មកវិញនៃផែនការសកម្មភាពរួមគ្រប់ជ្រុងជ្រោយ (JCPOA) ប្រសិនបើអ៊ីរ៉ង់ធ្វើដូចគ្នា។ លោកក៏បាននិយាយផងដែរថា សហរដ្ឋអាមេរិកនឹងនៅតែបន្តស្វែងរកការរំសាយអាវុធនុយក្លេអ៊ែរទាំងស្រុងនៅឧបទ្វីបកូរ៉េ។
លោក Biden ក៏បាននិយាយផងដែរថា សហរដ្ឋអាមេរិកនឹងឆ្លើយតបយ៉ាងដាច់ណាត់ ចំពោះការវាយប្រហារតាមប្រព័ន្ធបច្ចេកវិទ្យា។ ការអត្ថាធិប្បាយរបស់លោកបានកើតឡើង ខណៈដែលសហរដ្ឋអាមេរិក កាលពីថ្ងៃអង្គារបានសំដៅដល់ក្រុមឧក្រិដ្ឋជនចាប់ជំរិតទារប្រាក់តាមប្រព័ន្ធ Softwear នៅក្នុងទីផ្សារហិរញ្ញវត្ថុដោយប្រកាសដាក់ទណ្ឌកម្ម ប្រឆាំងឈ្មួញកណ្តាលរូបិយប័ណ្ណមានមូលដ្ឋាននៅប្រទេសរុស្ស៊ី ដែលមន្ត្រីនិយាយថា បានធ្វើប្រតិបត្តិការខុសច្បាប់សម្រាប់ក្រុមអ្នកវាយប្រហារ ឬពួកជំរិតទារប្រាក់តាម Online៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
