រដ្ឋមន្រ្តីក្រសួងសុខាភិបាលរដ្ឋ Gujarat បានននិយាយនៅថ្ងៃព្រហស្បតិ៍នេះថា ជំងឺគ្មានអត្តសញ្ញាណ មានរោគសញ្ញាដូចជាជំងឺរលាកសួត រួមទាំងគ្រុនក្តៅ បានសម្លាប់មនុស្សយ៉ាងហោច ១៦នាក់ នៅរដ្ឋភាគខាងលិចប្រទេសឥណ្ឌាមួយនេះ ។

 ក្រុមមន្រ្តីក្រសួងសុខាភិបាលរដ្ឋ រួមទាំងលោករដ្ឋមន្រ្តី Rushikesh Patel បានចុះសួរសុខទុក្ខអ្នកជំងឺនៅស្រុក Kachch និងបានជួបក្រុមការងារមន្ទីរពេទ្យ ដើម្បីបើកការស៊ើបអង្កេតលើមូលហេតុនៅពីក្រោយការរីករាលដាលជំងឺដ៏ចម្លែកមួយនេះ ។

 លោក Patel និយាយថា ជំងឺបង្កឡើងដោយភ្នាក់ងារចម្លង ដូចជាជំងឺគ្រុនចាញ់ ជំងឺគ្រុនឈាម ជំងឺឈីក និងជំងឺរលាកទងសួត គឺជារឿងធម្មតាទេ អំឡុងរដូវវស្សានៅក្នុងប្រទេសឥណ្ឌា ។

លោកបន្តថា ទោះបីជាយ៉ាងណាក៏ដោយ មនុស្សស្លាប់យ៉ាងច្រើន ក្នុងពេលតែមួយបែបនេះ បង្ខំឲ្យមានការស៊ើបអង្កេតយ៉ាងល្អិតល្អន់មួយនៅក្នុងស្រុក ហើយមូលហេតុពិតប្រាកដ នៅមិនទាន់បានដឹងនោះទេ ។

គួរឲ្យដឹងថា ភ្លៀងធ្លាក់ខ្លាំង បានវាយប្រហារតំបន់ឆ្នេរប្រទេសឥណ្ឌា និងប្រទេសប៉ាគីស្ថាន ដែលស្ថិតនៅតាមបណ្តោយសមុទ្រអារ៉ាប់ កាលពីខែមុន បង្កឲ្យមានការជន់លិចទីក្រុងជាច្រើននៅរដ្ឋ Gujarat របស់ប្រទេសឥណ្ឌា បង្ខំឲ្យមនុស្សរាប់ម៉ឺននាក់ ជម្លៀសខ្លួនចេញពីផ្ទះសម្បែងរបស់ពួកគេ និងបណ្តាលឲ្យមនុស្សយ៉ាងហោច ២៨នាក់ បាត់បង់ជីវិត ៕